އެއީ އަހަރެންގެ މާޒީއެވެ. ހިތްދަތި އެތައް ދުވަސްތަކެއް ގުނަމުން ދިޔަ ކަރުނައިގެ ހަޔާތެކެވެ. އަހަރެން އުޅެ ބޮޑުވީ ކުޑަކުދިންގެ ހިޔަލެއްގައެވެ. އަހަރެންގެ ހަޔާތުގައި އެނޫން ތަނެއްގައި އުޅުނު ހަނދާނެެއް އަހަރެން ނުވެއެވެ. މާޔޫސްކަމާއި މޮޅިވެރިކަމުގެ ދުވަސްތައް އަހަރެން ގުނަމުން ދިޔައީ އަހަރެންގެ މަޔަކު ބަފަޔަކު ނެތް ހާލުގައެވެ. އޭރު އަހަންނަށް އެނގިގެން، އިންސާނަކު ދުނިޔެއަށް އުފަންވުމުގައި ކޮންމެހެން މަޔަކު އަދި ބަފަޔަކު ބޭނުމެއް ނުވެއެވެ. އެފަދަ ކުޑަކުދިންގެ ހިޔަލެއްގެ ތެރެއަށް ކޮންމެ އިންސާނަކުވެސް އުފަންވަނީއެވެ.

މިއަދު އަހަރެންނީ ބޮޑުވެފައިވާ ޒުވާނަކީމެވެ. އަހަރެން، ކުޑަކުދިންގެ ހިޔަލުގައި ގުނަމުން އައި ދުވަސްތަކުން އެތައް ވާހަކައެއް މިއަދު އަހަރެންނާއި ހަމައަށް އެތަނުގައި އަހަރެންގެ ބެލެނިވެރިން ކަމުގައި ތިބި މީހުން ކިޔައިދީފިއެވެ. އެއީ އަހަރެންގެ މާޒީއެވެ. އަހަރެންނަށް އަހަރެންގެ ހަގީގަތް މިއަދު އެމީހުން ހާމަކޮށްދީފިއެވެ. އަހަންނަކީ ކާކުކަން އަހަރެންނަށް ނޭނގިފައި ހުރި ހުރުމަށް އެމީހުންގެ ފަރާތުން ލިބުނީވެސް މާޔޫސްކަމާއި ވާނުވާގެ ޖަވާބެކެވެ. އަހަންނަކީ އެ ކުޑަކުދިންގެ ހިޔަލަށް "ހޮވައިގެން" ގެނެވުނު ކުއްޖެކެވެ. އަހަރެންގެ ބެލެނިވެރިން ގޮތުގައި ތިބި މީހުން ބުނި ގޮތުގައި އެތަނަށް އަހަރެން ގެނެވުނު އިރު، އަހަރެންނަށް އަދި އަހަރެއްވެސް ނުފުރޭނެއެވެ. އަހަރެންގެ އުފަން ތާރީހެއްވެސް ދެނެހުރި މީހަކު ނެތެވެ. ފުލުހުން އަހަރެންގެ މައިންބަފައިން ހޯދަން ކުރި މަސައްކަތް ވަނީ ނާކާމިޔާބު ވެފައެވެ.

ކަން އޮތީ މިހެން ކަމުގައި ވީނަމަވެސް އަހަރެންނަށް މިއަދު ޔަގީންވާ އެއްކަމަކީ އަހަރެން ބަނޑުއަޅާ ވިހޭ މަންމައެއް ވާނޭ ކަމެކެވެ. އަދި އެ މަންމަގެ ބަނޑުގައި އަހަރެން އަށަގަތުމަށް މެދުވެރިވި ބައްޕަޔަކު ވާނޭ ކަމެވެ. ހިތާމަ އަކީ އެއިން މީހެއްގެ ކުޑަވެސް އިޝާރާތެއް މި ކާއިނާތުގައި އަހަންނަށް ފެންނަން ނެތުމެވެ.

އަހަންނަކީ މިއަދު 18 އަހަރު ފުރި، ވަޒީފާއެއް އަދާކުރަމުންދާ ޒުވާނަކީމެވެ. މާލޭގެ ފިހާރައެއްގައި ސޭލްސް މެން އެއްގެ ގޮތުގައެވެ. އެ ފިހާރައިން އަހަންނަށް އެ ފުރުސަތު ހޯދައިދިނީ ކުޑަކުދިންގެ ހިޔަލުގައި އަހަރެންގެ ބެލެނިވެރިން ކަމުގައި ތިބި މީހުންނެވެ. ހަޔާތުގެ ދުވަސްތައް މިހާލުގައި ގުނަމުން ދިޔައީ ހަޔާތުގެ ޗަމަންގައި އެތައް އައު ގަސްތަކެއް ފަޅާ ކުރިލާ ހެދެމުންނެވެ. އެތައް ވެލެއްގެ ކުރިތައް މާ ދުރަށް ދުވަމުންނެވެ. އެތައް ގަހެއްގައި ކުލަރީތި މާތަކާއި ދޮންވެ ފައްކާވަމުންދާ މޭވާތަކުގެ ވަސް މުޅި ހަޔާތަށް ގެނުވަމުންނެވެ.

******

އިރާއި ދުނިޔެ އޭގެ ޠަބީއަތުގައި ދައުރުވަމުން ދަނީ އޭގައި ލަސްކަމެއް ނެތިއެވެ. އަހަރެންނަށް މިއަދު 20 އަހަރު ފުރިއްޖެއެވެ. މާލޭގައި ކުދިން ބައިތިއްބާ ގެއެއްގައި އަހަރެން އުޅޭތާ މިވީ 1 އަހަރެވެ. އެ ފިހާރައިގެ އަތްގާތްކޮށްދޭ މުވައްޒަފެއްގެ ދަރަޖައިން އެތަނުގެ ހިސާބު ބަލަހައްޓާ އެސިސްޓެންޓު އެކައުންޓެންޓަކަށް އަހަރެން ކުރިއަރައިފިއެވެ. ސާނަވީގެ ފާހާއި އެކުގައެވެ. މިއަދު އަހަންނަކީ ހަމަ އިސްކޮޅަށް ތެދުވެފައި ހުރި ޒުވާނަކީމެވެ. އަހަރެންގެ ނަމަކީ ނަޒީރެވެ. މި ނަމުގައި ވެސް އާއިލީ ގުޅުމެއް ނެތެވެ. މިއީ ވެސް "ހޮވައިގެން" ކީ ނަމެކެވެ.

ހަޔާތުގައި ހިނިތުންވުމާއި، ދިރިއުޅުމުގެ ޗަމަންގައި ބަހާރު މޫސުން އޮތަކަސް އަހަރެންގެ މައިންބަފައިންނާއި މެދު ވިސްނުމަކީ އަހަރެންގެ އާދައެކެވެ. ހަގީގަތުގައި ކިތަންމެ ދެރަވިޔަސް އަހަރެންގެ ނަފްސު ހިތާމައިގެ ތެރެއިން އުފަން ކުރުވަނީ ރުޅިވެރިކަމުގެ ހުޅުކޮޅެކެވެ. އެއީ އެމީހުންގެ ހަނދާން ކުރާ ކޮންމެ ފަހަރަކު އަހަރެންގެ ލޮލުން ކަރުނަ ނުހިލޭ ސަބެބެވެ. މަގުތައް މަތީ ހިނގާ އިރާއި، ފިހާރައިގައި އިންނަ ވަގުތު، އެހެން މީހުން އެމީހުންގެ މައިންބަފައިންނާއި އެކު އެ ޖަހާ ސަކަރާތަކީ އަހަރެންނަށް ބަލަން ފަސޭހަ މަންޒަރެއް ނޫނެވެ. ދެރަވެއެވެ. ހިތްދަތިވެއެވެ. އެއާއި އެކު ރުޅިވެސް އާދެއެވެ.

އުމުރުން މިހާ ދުވަސް ވީ އިރު، މަޔަކު ހުރިކަމާއި ބަފަޔަކު ހުންނާނޭކަން އެނގުނު ނަމަވެސް އެމީހުންގެ ކުޑަ ނަމަވެސް ހިލަމެއް އަހަރެންނަށް ނުވުމަކީ އަހަރެންގެ ހިތުގައި ވަރުގަދަ އަޒުމެއް މިއަދު ކަނޑައެޅުނު ސަބެބެވެ. އެއީ އެމީހުން ހޯދުމެވެ. އެމީހުންގެ ހަގީގަތް ހޯދުމެވެ. މިކަމަށް އަހަރެންގެ ހުރިހާ ވަގުތެއް ހުސްކުރީމެވެ. ތަހުގީގި އިދާރާއެއްގެ ބޭނުމެއް އަހަރެން ނުކުރަމެވެ. އެއީ ކަމެއް ވާނޭ ބައެއް ނޫންކަމުގެ އިހުސާސް އަހަރެންނަށް ކުރެވޭތީއެވެ. އަހަރެން ފެށީ ކުޑަ މަސައްކަތެއް ނޫނެވެ. އަހަރެންގެ މާޒީ ހޯދުމުގެ ދިގު ދަތުރެކެވެ. ކުރިމަތިން ކިތަންމެ ގަދަ ކަނޑެއް ހުރަސް ކުރަން ޖެހުނު ނަމަވެސް އެކަނޑަކަށް އެރެން ތައްޔާރުގައި އަހަރެން މި ދަތުރު ފެށީމެވެ. 

 

ނުނިމޭ....