އެއީ މީގެ ވިއްސަކަށް އަހަރު ކުރިއެވެ. އަހަރެން އުފަން ވެފައިވާނީ އެ ދުވަސްވަރުގައެވެ. އަހަރެންގެ މާޒީ ހޯދުމަށް ފަސްގަނޑުގައި ޖެހި ފުރަތަމަ އުދެއްޔާއެކު ފަސްތަކެއް ނެގީމެވެ. އެއީ އަހަރެން "އުފަންވި" ތާރީހައި ގާތްކުރާ ތާރީހުތަކުގެ ހަބަރުތައް ބެލުމެވެ. އެގޮތުން ކޮންމެ ދުވަހަކު އެތައް ގަޑި އިރެއް އަހަރެން ލެޕްޓޮޕް ދޮށުގައި ހޭދަ ކުރީމެވެ. ރާއްޖޭގެ އެތައް ނޫހެއް އެފުށް މިފުށަށް ޖެހީމެވެ. އަލިމަގެއް އަދި ފެންނަން ނެތަސް އަހަރެން އުންމީދެއް ކަނޑައެއް ނުލަމެވެ.

*****

އެނދުގައި ލައްގަނެ، އުނގަށް ލެޕްޓޮޕް ލައިގެން އިނދެ ނިދި ޖެހިފާ އިންދާ ހޭލެވުނީ ފޯނަށް އައި މެސެޖަކުންނެވެ. ސިހިފައި އަވަސް އަވަހަށް ދެލޯ އުނގުޅަމުން އެ މެސެޖު ބަލާލެވުނެވެ. ނަމަވެސް އެއީ ބަޔަކު ކުރާ ކޫސަނި އިސްތިހާރެއްގެ މެސެޖެކެވެ. އެއާއި އެކު އެނބުރި، ޖެހިފާ އިން ނިދީގެ ތެރެއަށް ޣަރޫބަވާން ހިތް އެދުނެވެ. ނަމަވެސް އެކަން ހުއްޓުވީ އަހަރެންގެ ލޮލުގައި އަޅާގަތް އެހެން މަންޒަރަކުންނެވެ. އެއީ ލަޕްޓޮޕް އިން ހޮޅުވިފައި އިން ނޫހެއްގައި އިން އަރިމަތީ ސުރުހީއެކެ. ރާއްޖޭގެ އުތުރުގެ ރަށެއްގެ ފަޅު ގެއެއްގެ ތެރޭގައި އޮތް ކުޑަކުއްޖަކަށް އެރަށު ހެލްތު ސެންޓަރުގައި ފަރުވާދެމުން ގެންދާ ވާހަކައެވެ. އަވަސް އަވަހަށް އަހަރެން އެ ހަބަރަށް ފިތާލީމެވެ. ނަމަވެސް ލިބުނު އަނެއް މާޔޫސް ކަމަކީ އެއީ މާ ފަހުގެ ތާރީހެއްގައި ލިޔެފައިވާ ހަބަރެއް ކަމެވެ. ކަން އޮތީ އެހެންކަމުގައި ވިޔަސް އަހަރެން އުންމީދެއް ކަނޑައެއް ނުލަމެވެ.

*****

ދެތިން ދުވަސް ފަހެވެ، ކޮންމެ ދުވަހަކުވެސް އާދައިގެ މަތިން ހަބަރުތަކުގެ ސަފްހާތަށް މާޒީއަށް އުކަމުން ގެންދިޔައީމެވެ. އެއީ އެހެން ދުވަސްތަކާއި ވަކި ތަފާތު ދުވަހެއް ނޫނެވެ. ހަމަ އާދައިގެ ދުވަހެކެވެ. ނަމަވެސް ތަފާތު ކުރުވި އެއްކަމެއް އެބައޮތެވެ. އެއީ އެދުވަހު އަހަރެންނަށް އަހަރެންގެ މާޒީގެ އެއް ސަފްހާ ހުޅުވާލެވުނު ދުވަހެކެވެ. އެއީ ހަމަ އެ ނޫހުން އަހަރެންނަށް ފެނުނު ހަބަރެކެވެ. އެއީ މީގެ 20 އަހަރު ކުރީގެ ހަބަރެކެވެ. ހުޅުމާލޭ ވަލުތެރެއިން ހޮވި ކުއްޖެއްގެ ވާހަކައެވެ. އެ ހަބަރު އަހަރެން ކިޔާލީމެވެ. އެއީ ވިހޭތަނުން އެއްލާލާފައި އޮތް ކުއްޖެއް ކަމަށް ހަބަރުގައި އޮތެވެ. އަދި ހުޅުމާލޭ ހޮސްޕިޓަލުގައި އެ ކުއްޖާއަށް ފަރުވާދިން ކަމަށްވެސް އޮތެވެ. އަހަރެން ބޮޑަށް އަޅައިގަތީ އެއީ މީގެ 20 ެައަހަރު ކުރީގެ ހަބަރަކަށް އެ ހަބަރު ވީތީއެވެ. 

އަހަރެން އަވަސްވެގަތީ އެ ތާރީހުގައި އެހެން ނޫސްތަކުގައި އެ ހަބަރު އޮތްތޯ ބެލުމަށެވެ. ގިނަ ނޫސްތަކުގައި އެ ހަބަރު އެގޮތަށް އޮތެވެ. ނަމަވެސް މާ ބޮޑު ތަފްސީލެއް ނެތެވެ. އަހަރެން މާޔޫސް ކުރުވި ސަބަބަކީ އެއީއެވެ.

****

އެނގެއެވެ! އަހަރެންގެ މާޒީ ހޯދުމަކީ ފަސޭހަ ކަމެއް ނޫނެވެ. އެހެންކަމުން އެކަމުގައި އަހަރެން ދެން ވެސް އުންމީދެއް ކަނޑައެއް ނުލަމެވެ. ޖެހިގެން އައި ދުވަހު، އަހަރެން ހުޅުމާލޭގެ އެބުނާ ސަރަހައްދަކަށް ދިޔައީމެވެ. މިއަދުވެސް އެ ސަރަހައްދުގައި އޮތީ ބޯކޮށް ގަސްހެދިފައެވެ. މުޅި އެ ސަރަހައްދުގައި އަހަރެން އުޅުނީމެވެ. ގަސްގަހުގައި ކޭތުނީމެވެ. އެނގެއެވެ! 20 އަހަރު ކުރީގެ ނިޝާނެއް އަދި ހިލަމެއްވެސް އެތާކު ނުވާނެކަން އަހަރެންނަށް ޔަގީނެވެ. ހަމަވެސް އަހަރެންގެ ހިތް އެކަމަށް އެދުނީތީ ދިޔައީއެވެ.

ދުރުގައި ހުރި ޕާކެއްގައި އެކަހެރިކޮށް އިން އަށްޓެއްގައި އިށީދެލައިގެން އަނެއްކާވެސް އަހަރެންގެ މަަޒީއާއި މެދު ވިސްނާލީމެވެ. އެ މާޒީ ހޯދޭނޭ ގޮތެއް އަނެއްކާވެސް ފެނޭތޯ ވިސްނާން ފެށުނެވެ. ފުން ހިޔާލެއްގެ ތެރޭގައި ވިސްނަމުން ދިޔަ އަހަރެންގެ ސިކުނޑި ހޭލައްވާލީ މުސްކުޅި އަންހެނެއްގެ ކުކުރުމުގެ އަޑަކުންނެވެ. އަހަރެންނާ މުހާތަބުކޮށް ވާހަކަ ދެއްކީތީއެވެ. އެއީ އަހަރެން ދުވަހަކުވެސް ދުށް އަންހެނެއް ނޫނެވެ. އަހަރެން އެކަނި އެތަނުގައި ކީއްވެފަތޯ އެ އަންހެންމީހާ އަހަންނާ ސުވާލު ކުރިއެވެ. ކަމެއް ނުވާކަމަށް އަހަރެން ބުނީނެވެ. ނަމަވެސް މާޔޫސް ކަމާއި މޮޅިވެރިކަމުގެ އެ މޫނު އަހަރެންގެ މޫނާ ސީދާކޮށް އިރުކޮޅަކު އަހަރެންގެ މޫނަށް ބަލަން ހުއްޓެވެ. އަދި އިރުކޮޅަކުން އެނބުރި ހިނގައްޖެއެވެ. އަހަރެން ގަތް ބިރުން ގޮތެއް ނެތެވެ. ހިތުގައި ނުބައި ވަސްވާސްތަކާއި ބިރުވެރި ގިލަންތަކުން ވަކި އަޅުވާ ކަހަލައެވެ. އެތަނުން ތެދުވެ ބާރު ބާރަށް އަހަރެން ހިނގައިގަތީމެވެ. އަދި ބަސްހުއްޓިއަކަށް ގޮސް، ބަހަކަށް އަރައިގެން މާލެ އައީމެވެ.

 

ނުނިމޭ.......