އަހަރެންނަކަށް ނުނިދެއެވެ. ހަނދާންވަނީ އެ އަންހެން މީހާގެ އަޑެވެ. ސިފަވަނީ އެ އަންހެން މީހާގެ މޫނެވެ. އެއީ ދެން ވަކި ކާކު ހެއްޔެވެ؟ އެހެންނަމަވެސް އެ މީހާގެ އެ ހަނދާން އަހަރެންގެ ހުތަކުން ނުފޮހެވުނެވެ. ކުރުސިޔާ ދެން ވެސް ކިޔަން ހުރި ހުރިހާ ހެޔޮ އެއްޗެއް ފަށްފަށްކޮށް އަހަރެން ކީމެވެ. ނަވެސް އެ މީހާގެ އެ ސިފަ އަހަރެންގެ ލޯ މައްޗަކުން ނުގެއްލެއެވެ. ވިސްނާލުމަށް ހިތް އެދުނަސް ގިނަފަހަރަށް ގަންނަނީ ބިރެވެ. ލޯ މަރާލިޔަސް އައިސް އަހަރެންގެ ކަންފަތް ބުޑުގައި އަހަރެންނަށް އެމީހަކު ގޮވާކަމިގެ އިހުސާސް ކުރެވެއެވެ.

އެރޭ ހަތަރުދަމު ދިޔައީ އެހެންނެނެވެ. ލޮލުފިޔަކަށް ނުޖެހުނެވެ. ހާސްވެސް ވެއެވެ. އެއާއި އެކު ފުން ހިޔާލަކުން ވިސްނެންވެސް ވިސްނެއެވެ. ޖެހިގެން އައި ދުވަހު ހެނދުނު ހެނދުނާ އަހަރެން އަވަސްވެގަތީ އަނެއްކާވެސް ހުޅުމާލޭގެ އެ ސަރަހައްދަށް ދިއުމަށެވެ. ހުތުގައި ހުރި ނުތަނަވަސްކަމާއި ހާސްކަށް ފިލާނޭ އިތުރުގޮތެއް އަހަރެންގެ ސިކުނޑިއަށް ނުވިސްނުނީތީއެވެ.

ބަހަށް އަހައިގެން އަހަރެން ހުޅުމާލެއަށް ދާން މިސްރާބު ޖެހީމެވެ. މާލެއިން ބަސް ހުއްޓާ އެންމެ ފަހު ބަސްހުއްޓިއަށް ބަސް ހުއްޓާލުމަށްފަހު އެ ތަނުން އަރަން ހުރި މީހުން އަރަމުން ގެންދިޔައެވެ. އަހަރެންނަށް ކުއްލި ސިހުމެއް ގެނުވީ އެއްކަލަ އަންހެނާ އެ ބަހަށް އެރީތީއެވެ. އަހަރެން ކުރީގައި ހުރި ގޮނޑިއާ ނިވައިވެލާ އެ އަންހެނާއަށް ފިލީމެވެ. ކުރީގައި ހުރި ހުސްގޮނޑިއެއްގައި އެ އަންހެނާ އިށީނދެލިއެވެ. ނުތަނަވަސްކަން ވެރިވެފައިވާ އަހަރެންގެ ހިތައް އަނެއްކާވެސް އުދާސްތަކެއް ބަންޑުންވި ކަހަލައެވެ.

ކޮންމެ އަކަސް، އަހަރެންގެ މަންޒިލަށް ބަސް ހުއްޓައިފިއެވެ. އެ އަންހެނާވެސް ފޭބީ ހަމަ އެ މަންޒިލަށެވެ. އިތުރު ބަޔަކުވެސް އެ ސަރަހައްދަށް ފޭބުމާއި އެކު އެމީހުންގެ ފަހަތުން އަހަރެންވެސް ފޭބީމެވެ. އަދި އެ އަންހެން މީހާއަށް އަހަރެން ފާރަލީމެވެ. ބިރުން ހުރެއެވެ. ނުތަނަވަސްކަމާއި ހާސްކަން މަތީ ހުރެއެވެ. އެ އަންހެނާ ހިނގައިގަތީ ކައިރީގައި ހުރި ހޮޓަލަކާއި ދިމާލަށެވެ. އެތަނުން ދެތިން ހެދިކާކޮޅު ނަގައިގެން ކޮތަޅަކަށް ލައިގެން ހިނގައިގަތެވެ. އަހަރެން ދުރު ދުރުން އެ އަންހެނާއަށް ފާރަ ލީމެވެ. އެ އަންހެނާ ގޮސް ހުއްޓުނީ އެއްކަލަ ޕާކުގައެވެ. އެތާހުރި އަށްޓެއްގައި އިނދެ، އެ ގެނައި ހެދިކާކޮޅު ކާންފެށިއެވެ. އަދި އަތުގައި އޮތް ކޮތަޅަކުން ފެންފުޅިއެއް ނަގާ ފެންފޮދެއްވެސް ބޯލިއެވެ.

ކައި ނިމިގެން އެ އަންހެން މީހާ ތެދުވިއެވެ. އަދި ދެފަރާތް ބަލާ ހޯދަން ފެށިއެވެ. ހީވަނީ މީހެއްގެ އިޝާރާތެއް ވޭތޯ ބަލާހެންނެވެ. އަހަރެން އަނެއްކާވެސް ބިރުގަތީ އެހެންވެގެންނެވެ. ނަމަވެސް އެ އަންހެނާ މާ ގިނައިރަކު އެތާކު މަޑެއް ނުކުރިއެވެ. ހިނގައިގަތެވެ. އެއްލާލައިފާ އޮއްވާ ފެނުނޭ ބުނާ ކުއްޖާ ފެނުނު ދިމާލަށެވެ. އެ ހިސާބަށެވެ. އެތަނުގައި އެ އަންހެނާ އެނބުރެމުން ހިނގަމުން ދިޔައެވެ. ދުރުގައި އަހަރެން ހުރީ އެ މަންޒަރު ބަލާށެވެ.

*******

"ކޮއްކޯ...!" އަހަރެންހިތް ހުއްޓުނު ކަހަލައެވެ. މީހަކު އަހަރެންގެ ކޮނޑުގައި އަތްޖަހާ ގޮވާލީތީއެވެ. އަހަރެން ހައިރާންކަމާއި އެކު އެމީހާއާއި ދިމާލަށް ބަލައިލީމެވެ. އެއީ އެ ޕާކު ސާފު ކުރަން އުޅޭ މީހުންގެ މީހެކެވެ. އެއީވެސް އަންހެނެކެވެ. " ކޮއްކޮ އެ އަންހެން މީހާއަށް ދޯ ތި ބަލަނީ..!" އެމީހަކު ބުންޏެވެ. "... އާނ... އުނހޫނ... އާނ.. އާނ" ނިކަން ނުގޮތަކަށް އަހަރެންނަށް ޖަވާބު ދެވުނެވެ. "ކޮއްކޮއަށް އެނގޭތަ އެއީ ކާކުކަން؟" އެމީހަކު އަނެއްކާވެސް އަހަރެންނާ ސުވާލު ކުރިއެވެ. "ނޫން.. ނޭނގެ..!" އަހަރެން ހިންދިރުވާލަމުން ބުނީމެވެ. "އެއީ މީގެ ވިއްސަކަށް އަހަރު ކުރިން ފެށިގެން މިތަނަށް އައިސް އެހެން އުޅޭ މީހެއް! މީހުން ބުނޭ އެއީ މޮޔައެކޭ! އަނެއްބަޔަކު ބުނޭ އެއީ ސިހުރުވެރިއެކޭ! ދައްތަމެން އެކަމު އަޅައެއް ނުލަން! އާދަޔާ ހިލާފު ނުރައްކަލެއް އެމީހާގެ ކިބަޔަކުން ދައްތަމެންނަކަށް ނުފެނެ! ވަރަށް ދެރަވެފަ އަބަދުވެސް ވާހަކަ ދައްކާނީ! ވީގޮތެއް ނުބުނާނެ އެކަކު ކައިރިވެސް... އެހެންވެ ކަންނޭނގެ މޮޔައޭ ސިހުރުވެރިއެކޭ ކިޔަނީ..!" އެމީހަކު ތަފްސީލި ޖަވާބެއް އަހަރެންނަށް ދިނެވެ. އަހަރެން ބޯ ޖަހާލީމެވެ.

އަނެއްކާ އަހަރެންގެ މަގުސަދަށް ބޮޅެއް އިތުރުވީއެވެ. އެއީ ވިއްސަކަށް އަހަރު ކުރިންފެށިގެން އެތަނަށް އަންނަ މީހަކަށް އެ އަންހެނާ ވީތީއެވެ.

 

ނުނިމޭ......