އެ އަންހެން މީހާ އެތަނަށް އަންނަނީ ކޮންކޮން ދުވަހަކުތޯ އަހަރެން އަހާ އޮޅުން ފިލުވީމެވެ. އެ ދުވަސްތަކާ ދިމާކޮށް އަހަރެން އެތަނަށް އައުމަށް ގަސްތުކުރީމެވެ. އަދި އެ އަންހެން މީހާއާއި ބައްދަލުކޮށް ވާހަކަ ދައްކަން އަހަރެން ގަސްތުކުރީމެވެ. ހިތުގައި ޒާތެއްގެ ނުތަނަވަސްކަމެއް އުފެދިފައި ވީނަމަވެސް، ސިކުނޑި އެދި ގޮވަނީ އެމީހަކާއި ބައްދަލުކޮށް ކޮންމެވެސް ވާހަކައެއް ދައްކާލާށެވެ.

*******

އޭގެ ދެދުވަސް ފަހެވެ. ބަހަށް އަރައިގެން އަހަރެން ހުޅުމާލެދާން ފުރީމެވެ. މާލޭގެ އެންމެ ފަހު ބަސްހުއްޓިން އެ އަންހެނާ ބަހަށް އެރިއެވެ. ކުރީ ފަހަރެކޭ އެއްގޮތަށް މިހަފަރުވެސް އެމީހަކަށް އަހަރެން ނުފެންނާނޭހެން އަހަރެން ފިލީމެވެ. ހުޅުމާލޭގެ މަންޒިލަށް ދެވުމާއި އެކު ބަހުން ފޭބީމެވެ. އަދި ސިއްރު ސިއްރުން އެ އަންހެނާގެ ފަހަތުން ފާރަލަމުން އަހަރެން ހިނގީމެވެ. މިއަދުވެސް އެ އަންހެނާ ކަންކަން ކުރަމުން އައީ ކުރީ ދުވަހެކޭ އެއްގޮތަށެވެ. އަހަރެން އެ އަންހެނާ އެ ޕާކުގައި އިންދާ އެ އަންެހެނާ އާއި ބައްދަލުކުރަން ހިނގައި ގަތީމެވެ. ނުތަނަވެސް ވެފައިވާ ހިތަކާއި، އުންމީދު އައުކޮށްދޭ ވިސްނުމެއް އޮވެގެންނެވެ.

"އައްސަލާމް އަލައިކުމް ދައްތާ...." ކަރުގައި އަޅައިގަނެގެން އަހަރެން ގޮވާލީމެވެ. ސިހިފާ ކަހަލަ ގޮތަކަށް އެ އަންހެނާ އަހަރެންނާ ދިމާލަށް ބަލައިލި އެވެ. އަދި އިޖާބަ ދިނުމުގެ ގޮތުން ބޯ ޖަހާލިއެވެ. "މިތާ އިށީނދެލިޔަސް އެންމެ ރަނގަޅުތަ.." އަހަރެން އަހާލީމެވެ. މިފަހަރުވެސް އެ އަންހެންމީހާ ވާހަކަ އެއް ނުދެއްކިއެވެ. އިޖާބަ ދިނުމުގެ ގޮތުން މިފަހަރުވެސް ބޯ ޖަހާލީއެވެ. އަހަރެން އެތަނުގައި އިށީނދެލީމެވެ. "ދައްތަގެ ނަމަކީ ކޮބާތަ؟" އަހަރެން އަނެއްކާވެސް އަހާލީމެވެ. އެ މީހަކު ޖަވާބެއް ނުދިނެވެ. އަހަރެން ސުވާލު ތަކުރާރުކޮށްކީމެވެ. "މަރިޔަމް ތައުފީގާ..." މަޑުމަޑު އަޑަކުން އެ އަންހެނާ ޖަވާބު ދިނެވެ. "އަހަރެން ބޭނުން ދައްތަގެ ވާހަކަ އަޑު އަހަން... މަށަށް ކިޔައިދޭންވީނު..." އަހަރެން ސީދާ ނުކުތާއަށް ދިޔައީމެވެ. އެ އަންހެނާ ބަލާލީ ސީދާ އަހަރެންގެ ދެ ލޮލަށެވެ. އަދި އޭނާގެ ވާހަކަ ކިޔައިދޭން ފެށިއެވެ.

******

އޭނާގެ ވާހަކައިގައި ބުނީ މީގެ ވިއްސަކަށް އަހަރު ކުރިން އޭނާގެ އަންހެން ދަރިއަކު ބަލިވެ އިންކަމަށެވެ. ރަށް މެދަށެވެ. އެކަން އެ ކުއްޖާގެ ބައްޕައަށް އެނގުމުން އެކަމާ ރުޅި އިސްކުރިކަމަށެވެ. އެއީ އެ ކުއްޖާގެ އުމުރުން އޭރު 15 ކަމުންނެވެ. ބަލިވެ އިންކަން އެ ކުއްޖާ ސިއްރު ކުރިއެވެ. އެހެން މީހުންނަށް އެނގުނު އިރު ބަނޑަށް ހަމަހަށް ވުރެ ގިނަ ދުވަސް ވެއްޖެއެވެ. ބައްޕަ ބޭނުންވީ ބަނޑުގައިއޮތް ދަރިފުޅު ވައްޓާލާށެވެ. ނަމަވެސް އެ ކުއްޖާ އާއި އެ އަންހެން މީހާ އެކަމަށް އިންކާރު ކުރިއެވެ. އެކަމުގެ ނަތީޖާ އަކަށް ވެގެން ދިޔައީ އެ ބައްޕަގެ ރުޅި އިތުރަށް ގަދަވެގެން ދިއުމެވެ.

އެއީ އެ ކުއްޖާގެ ބަނޑަށް ނުވަމަސް ފުރުނު ފަހެވެ. ބަނޑުގައި ވިހެއުމުވެ ވޭންވަރު އެޅިއެވެ. އެއާއި އެކު އެއަންހެން ކުއްޖާ ގޮވައިގެން އެކުއްޖާގެ ބައްޕަ އައީ މިތަނަށެވެ. އެ އަންހެނާ އޭނާގެ ގޭގައި ބަނދެފައި ބާއްވާފައެވެ..........

މިއަދާ ހަމައަށްވެސް އެ ދެމައިންނަށް ވީގޮތެއް އެ އަންހެނާ އަކަށް ނޭނގެއެވެ. މަރާލީއޭ ކިޔާތީ އެ އަންހެނާ އަޑު އަހައެވެ. އަދި ހަބަރުތަކާ ނޫސްތަކުންވެސް އެރޭ އެތަނުން ވިހާފައި އެއްލާލައިފާވާ ކުއްޖަކު ހޮވިކަމުގެ ވާހަކަތަކެއްވެސް އެ އަންހެނާ އަޑުއެހިއެވެ. އޭރު ވެސް އަދި މިހާރުވެސް އެ އަންހެނާއަަށް އެކަން ގަބޫލެއް ނުކުރެވެއެވެ. އެ އަންހެނާގެ އޭރުގެ ފިރިމީހާގެ ކިބައިން ސަލާމަތްވެ މިނިވަންވީ އޭގެ އަހަރުތަކެއް ފަހުންނެވެ. އެ ފިރިހެނާގެ ބާރު ގަދަ ކަމާ މަގާމުގެ މޮޅުކަމެއް، އެ އަންހެނާ ދައްކާ އެއްވެސް ވާހަކައެއް، އޭރު އަޑު އެހި ކަންފަތެއް ނެތެވެ. އެ ހިތާމައިގައި އެ އަންހެނާ މުޅި އުމުރު ގުނަމުން އެ ދަނީއެވެ.

ހަފްތާއަކު 4 ދުވަހު، އެ ސަރަހައްދަށް އެ އަންހެނާ އަންނަނީ އޭނާގެ އަންހެން ދަރިފުޅާ، އޭނާގެ މާމަ ދަރިފުޅަށް ވީ ގޮތެއް އެނގޭތޯއެވެ. އެ ދެމައިން ފެނޭތޯއެވެ. މީހުން އެ އަންހެނާއަށް މޮޔައަށް ގޮވަނީ އެހެން ވެގެންނެވެ.

*********

އެ އަންހެނާގެ ވާހަކަ ކުރުގޮތަކަށް ކިޔައި ދިނެވެ. އަހަރެންނަށް ވަރަށް ބޮޑު ހިތްހަމަ ޖެހުމެއް ލިބުނެވެ. ފަހަރުގައި އެއީ އަހަރެންގެ މާމަ ކަމުގައި ވެދާނެއެވެ. އެހެން ކަމުގައި ވަނީނަމަ، އަހަރެންގެ މަންމަ ދުނިޔޭގައި ހުރި ކަމެއް ނެތްކަމެއް އަދިވެސް ޔަގީނެއް ނޫނެވެ.

އަހަރެންގެ މާޒީ ހޯދުން އަދިވެސް އޮތީ ކުރިއަށެވެ. މިއީވެސް އެއްލުނު ލިގު ސަފްހާއެކެވެ.

 

ނުނިމޭ......