ޖެހިގެން އައި ދުވަހެވެ. ފިރިމީހާގެ މަސައްކަތް ނިންމާލުމަށްފަހު އަހަރެން ކޮލެޖުން އަންނަންދެން މަޑުކޮށްގެން އިނެވެ. އަހަރެން އައުމުން ލޯބިން ގަޔާކާރި ކޮށްލުމަށްފަހު "ބޭބީ. މިއަދު މިއުޅެނީ އެކީގައި މަސައްކަތްކުރާ ބޮޑު ގްރޫޕެއް ޕާޓީއެއް ރާވައިގެން. އެހާ ދުރަކު ނޫން. ހަމަ ދިވެހިން އުޅޭ. ގެއެއް." މިހެން ބުންޏެވެ. އަހަރެންގެ އެއްވެސް މައްސަލައެއް ނެތެވެ. ފިރިމީހާ ފެންވަރައިގެން ނިކުންނަން ވާއިރަށް ލާނެ އަންނައުނު އިސްތިރިކޮށްދިނީމެވެ. ވަރަށް އުފަލުން ހުރެ ގެއިން ނިކުމެގެން ދިޔައީ އަހަރެންގެ ނިތްކުރިއަށް ބޮސްދީފައެވެ. އެއީ އާދައެވެ.

އަހަރެންނާއި ފިރިމީހާ އެކަކު އަނެކަކު ދަންނަތާ 7 އަހަރު ވެދާނެއެވެ. ނަމަވެސް އެކީގައި ވަގުތު ހޭދަކުރުމުގެ ފުރުސަތެއް ނުލިބެއެވެ. އަހަރެން ކުރިން ވެސް ކިޔެވީ މިތަނުގައި ސްރީ ލަންކާގައެވެ. ފިރިމީހާ ކިޔެވީ އިންޑިޔާއިން އިންނެވެ. އަހަރެންގެ ކިޔެވުން ނުނިމޭތީ ލަންކާއަށް ބަދަލުވީ ކައިވެނިކޮށްގެންނެވެ. އެއީ ލޮކްޑައުންގެ ހަމަ ކުޑަދުވަސްކޮޅެއް ކުރިންނެވެ. އެހެން ކަމުން އަހަރެއްހާ ދުވަސް މި ދިޔައީ ދެމީހުން އެކީގައި ވަގުތު ހޭދަކުރުމުގައެވެ. ފިރިމީހާގެ ރައްޓެހިންނާއި އެކު ދާނެ ފުރުސަތެއް އޭނާއަކަށް ނުލިބެއެވެ. އަދި އެއީ ކިހިނެތް އުޅޭ ކޮން ބައެއްކަން އަހަރެންނަށް އެނގިފައެއް ނުވެއެވެ. ނަމަވެސް އެއް އަހަރު މިދިޔައީ ފިރިމީހާގެ އިންތިހާ ލޯތްބާއި އަޅާލުން ލިބިގެންނެވެ. އަހަރެން ވަރުގެ ނަސީބުވެރިން މަދުވާނެކަން ގަބޫލުކޮށް އެކަމަށް ކޮންމެ ދުވަހަކު ޝުކުރުވެރިވާ ހާލުގައެވެ.

އިރު އޮއްސޭއިރު ދިޔަ ބާބާކިއު ޕާޓީއެއް މާ އަވަހަށް ނުނިމޭނެ ކަން އަހަރެންނަށް އެނގެއެވެ. ޖެހިގެން އޮތީ ބަންދު ދުވަހެކެވެ. އެހެންކަމުން އަހަރެން ވެސް ފިރިމީހާއަށް ގުޅާ އަންނަ އިރެއް އަހާކަށް ބޭނުމެއް ނުވިއެވެ. އެކަނި ލިބުނު ވަގުތުކޮޅުގައި ފިލްމެއް ބަލަން އޮއްވާ ފިރިމީހާ ގުޅިއެވެ. އޭރު މެންދަރު 1 ޖަހަނީއެވެ. އަހަރެން ފޯނުނެގިއިރު ބާރުބާރަށް ފިރިމީހާ ރޯއަޑުއިވެއެވެ. އަހަރެންގެ މޭގަނޑު އަނގައަށް އައި ކަހަލައެވެ. ކިޔާ އެއްޗެއްވެސް ސާފެއް ނުއެވެ. އަހަރެންގެ ކާރިއަށް އަންނަ ބޭނުންކަމާ ނަމަވެސް ގެއަށް ދާން ނޭނގޭ ވާހަކަ ބުނަމުން ހަމަ ރޮނީއެވެ. ކިހިނެތްވީތޯ ސުވާލު ކުރުމުން ބުނީ، "ނިސާރުގެ ރައްޓެހިންނާ މައްސަލަޖެހިގެން އެތަނުގައި ތަޅާފޮޅާފަ މި އަންނަނީ. އެތަނުގެ ހުރި ހުރިހާ އެއްޗެއް ވެސް ހަލާކުކޮށްލާފަ މި އަންނަނީ" މިހެންނެވެ. އަހަރެންނަށް ބުނާނެ ހަމަ އެއްވެސް އެއްޗެއް ނޭނގުނެވެ. އަހަރެން ދައްކާ ވާހަކައެއްވެސް އޭނާ އަޑެއް ނާހައެވެ. ރޮމުން ރޮމުން ވާހަކަ ދައްކަމުން ދިޔައެވެ. އަހަރެން ވެސް ނިސާރު ހަމަޖެއްސޭތޯ މަސައްކަތް ކުރަމުން އެހީމެވެ. "ބޭބީ.. ބޭބީ.. އަޑުއަހާބަލަ! ގެއަށް އަންނަ ނޭނގުނަސް ހާސްނުވޭ. ހަމަޖެހިބަލަ. މަރީ ދާނަން ބޭބީ ބަލާ. ކޮން ހިސާބެއްގަ ތިހުރީ؟" މީގެ ޖަވާބުގައި ކުރިއަށް ވުރެ ބާރަށް ރޮއިގަނެފައި ހުރިހިސާބެއް އެއް ގޮތަކަށް ވެސް ނޭނގޭ ކަމަށް ބުންޏެވެ. އަހަރެން ތަކުރާރުކޮށް އަހަމުން ދިޔައީ ފިހާރައެއްގެ ނަންބޯޑު ވިޔަސް ފެންނަން އިންތޯ ބެލުމަށެވެ. ނަމަވެސް އެހިސާބުގައި ފިހާރައެއް ފެންނަން ނެތްކަމާ އެއްވެސް ތަނެއްގައި ނަންބޯޑެއް ނެތްކަމަށް ބުނުމުން އަހަރެންނަށް ވެސް ރޮވުނެވެ. ލަންކާގެ އެކި ހިސާބުގައި ދިވެހިން ދިރިއުޅެއެވެ. މި ދަންވަރު އަހަރެންގެ ފިރިމީހާ ހޯދަން އަހަރެން ހަދަންވީ ގޮތެއް އަހަރެންގެ ވިސްނުމަކަށް ނާދެއެވެ. ދެން އަހަރެން އެދުނީ ފިރިމީހާގެ ލައިވްލޮކޭޝަން ފޮނުވުމަށެވެ. އޭގެ ޖަވާބަކަށް ވެސް އައީ، "ބޭބީ. ނިސާރު އަކަށް ނޭނގެ ލައިވްލޮކޭޝަން ފޮނުވާކަށް. މި ހިނގަނީ ހަމަ. ދާނަން ގެއަށް. ނިސާރުގެ ބޭބީ ކާރިއަށް ދާނަން" މިއެވެ.

ފިރިމީހާއަށް ލޮކޭޝަން ފޮނުވަން ނޭނގޭކަމަށް ބުނުމުން އޭނާ ހުރި ހާލަތާއި މެދު ފުރަތަމަ ފަހަރަށް ޝައްކުވިއެވެ. ގޫގުލް މެޕުން ލޮކޭޝަން ފޮނުވަން ނޭނގި އެއް ނުހުންނާއެވެ. އޭގެ ދުވަސްކޮޅެއް ކުރިން އެއްޗެހިތަކެއް ގަންނަން ވަރަށް ދުރުހިސާބަކަށް ގޮސް ހުރެގެން ވެސް ލޮކޭޝަން ފޮނުވިއެވެ. ނަމަވެސް އެވަގުތު އޭނާގެ ސިކުނޑިއަށް އެއްވެސް އެއްޗެއް ނަގައި ނުގަނެވުނީއެވެ. އަހަރެންނަކީ ވެސް އެހާ ފަސޭހައިން ގޮތް ހުސްވާ މީހެއް ނޫނެވެ. ފޯނު ސްޕީކަރަށް ލުމަށްފަހު މެޕް ހުޅުވައިގެން އަހަރެން ބުނާ ގޮތަކަށް ކަންތައް ކުރުމަށް އެދުނީމެވެ. އެކަން ވެސް އޭނާއަކަށް ނުވިއެވެ. އަހަރެންނާއި ފޯނުން ވާހަކަ ދައްކަން ހުރެގެން މަގުމަތިންދާ އުޅަނދުތައް ހުއްޓުވަން އާދޭސްކުރާ އަޑުއިވިފައި ހަމަ ހިތް ކުދިކުދި ވިއެވެ. ނިސާރު އަކީ އަހަރެންގެ މުޅި ދުނިޔެއެވެ. މައިންބަފައިންގެ ނުގަބޫލުގައި ނިސާރުއާ ކައިވެނި ކުރީ ވަރަށް ގިނަ ދުވަހު ރައްޓެހިވެގެން އުޅުމަށްފަހު ވަރަށް އިތުބާރުކޮށްގެންނެވެ. ނިސާރުއަކީ އަހަރެންނަށް ވަރަށް އަޅާލާ އެހާމެ އޯގާތެރި ފިރިއެކެވެ. އެހާލުގައި އޭނާ ހުރިކަން އެނގުމުން އަހަރެންނަށް ދެން ކަންކުރަންވީ ގޮތެއް ހަމަ ނޭނގުނެވެ. އޭނާގެ އެއްވެސް ރައްޓެއްސެއް ނުވަތަ މިރޭ އެ ދިޔަ ގެއެއް ހަމަ އެއް ގޮތަކަށް ވެސް ނޭނގެއެވެ. އަހާނެ މީހަކުވެސް ނެތެވެ.

އެހެންކަމުން އަލުން ހިތްވަރު ކޮށްފައި ލައިވް ލޮކޭޝަން ޖައްސާނެގޮތް ސްކްރީންޝޮޓް ނަގާފައި ފޮނުވީމެވެ. އަލްޙަމްދު ލިﷲ! ނިސާރުގެ ލައިވް ލޮކޭޝަން ލިބިއްޖެއެވެ. އެއީ ގެއާ މާ ދުރެއް ނޫނެވެ. ނަމަވެސް އޭރުވެސް މަގުމަތިންދާ އޮޓޯތައް ހުއްޓުވަން ރޮމުން އާދޭސް ކުރާ އަޑުއިވެއެވެ. އަހަރެން އެއްވެސް ވަގުތެއް ބޭކަރުކޮށްނުލާ ބުރުގާ އަޅާމުން ބޭރަށް ނުކުތީމެވެ. އަދި ޕިކްމީ އިން ޓެކްސީ އެއް ހޯދަން މަސައްކަތް ކުރަމުން ދިޔައީމެވެ.  ނަސީބަކުން ވަރަށް ފަސޭހައިން އޮޓޯއެއް ލިބިއްޖެއެވެ. ނަމަވެސް އޮޓޯ އައިސް ގޭ ކާރިއަށް މަޑުކޮށްލި އިރު ފިރިމީހާވެސް ކޮންމެވެސް މީހަކަށް ވާހަކަ ދައްކާއަޑު އިވެއެވެ. ޓެކްސީގެ ޑްރައިވަރުގެ އަޑުވެސް އިވެއެވެ. ތަކުރާރުކޮށް ޑްރައިވަރު އަހަމުން ދިޔައީ ވީ ކިހިނެތްތޯއެވެ؟ އެއަޑު އިވުމުން އިތުރަށް ބިރުގަތެވެ. ބަޔަކާ ހަމަނުޖެހުމެއް ހިންގާފައި އަންނަ ނަމަ ފިރިމީހާވެސް ޒަޚަމްވެފައި ހުރެދާނެއެވެ. އެކަމާ ބިރުން ހުއްޓާ އެ އޮޓޯ އަށް ފިރިމީހާ އެރުވިއެވެ. އެހެންކަމުން އަހަރެން ބުކް ކުރި އޮޓޯގެ މީހާއަށް ދަތުރަށް ވާ ލާރި ދިނުމަށްފަހު އޭނާ ފޮނުވާލީމެވެ. އަދި ފޯނު ކަނޑާނުލާ އޭނާއާ ވާހަކަ ދައްކަން ހުރީމެވެ. ފޯނަށް ކަމެއް ވެގެން ގުޅުން ކެނޑިދާނެކަމުގެ ބިރުވެސް އެވަރަށް އޮވެއެވެ. އެހެން ވެއްޖެ ނަމަ އަހަރެން އޭނާ ހޯދާނީ ކިހިނެތް ހެއްޔެވެ؟ މިއީ ރާއްޖެއާ އަޅާބަލާއިރު ބޮޑު ގައުމެކެވެ.

މާގިނައިރު ތަކެއް ނުވެއެވެ. ފިރިމީހާ އިން އޮޓޯ ގެއާ ކާރި ކުރިއެވެ. ނަމަވެސް އެއިން ފޭބުމުގެ ބަދަލުގައި އޭނާ އެދުނީ އަހަރެން އެއަށް އެރުމަށެވެ. އޭރު މެންދަމު 2 ޖަހައިފިއެވެ. ފިރިމީހާއިން ހާލު ފެނުމުން އަހަރެންގެ ކުޑަކުޑަ ދުނިޔެ ފުނޑުފުނޑު ވެގެން ދިޔަހެއް ހީވިއެވެ. އޭނާ އިނީ މަސްތު ހާލަތުގައެވެ. އެހެންކަމުން އިތުރަށް ސުވާލެއް ނުކޮށް އޮޓޯއަށް އެރީމެވެ. ފިރިމީހާ ޑްރައިވަރު ކާރި އެދުނީ އަނބުރާލުމަށްފަހު އެތަނުގައި ހުޅުވާފައި ހުރި ކުޑަ ފިހާރައެއްގެ ކާރިއަށް ދިއުމަށެވެ. އޭނާ ބޭނުންވީ ސިގިރެޓް ގަންނާށެވެ. ފިހާރަ ކާރިއަށް އޮޓޯ މަޑުކޮށްލުމުން އަހަރެން ފައިބައިގެން ގޮސް ސިގިރެޓް ގަންނަން ދިޔައިމެވެ. ފިރިމީހާ ފައިބައިގެން ފިހާރަ ކާރި ހުރި ގާފޮޅެއް މަތީގައި އިށީނެވެ. އަދި ހުއްޓުމެއްނެތި ޑްރައިވަރާ ވާހަކަ ދައްކަމުން ދިޔައެވެ. އޭނާ އަކީ ގޯސްމީހެއް ނޫންކަމަށާ، އޭނާގެއަށް ގެނެސްދިނީތީ ޝުކުރު އަދާކުރާ ކަމަށް ޑްރައިވަރު ގާތު ބުނަމުން ދިޔައެވެ. ނަމަވެސް އޭނާ ގެއަށް ގެނައުމުގެ ކުރިން ގިނަ ސުވާލުތަކެއް ކުރީތީ ފިރިމީހާ ހުރީ ހިތްހަމަ ނުޖެހިފައެވެ. ފިރިމީހާ އޭނާއާ ވާހަކަ ދައްކަމުން ދިޔައީ ހިންދީ ބަހުންނެވެ. ސްރީލަންކާގައި ހިންދީބަހުންވާހަކަ ދައްކާމީހުން ފެންނަނީ މަދުންނެވެ. ނަމަވެސް މި ޑްރައިވަރުވެސް ފިރިމީހާއަށް ހިންދީބަހުން ޖަވާބުދެމުން ދިޔައެވެ. އަދި ސުވާލުކުރަން ޖެހުނީ ކޮޅަށް ވެސް ނުހުރެވޭ ހާލުގައި ހުރުމުން ކަމަށް ބުނެ ފިރިމީހާ ހަމަ ޖެއްސޭތޯ ބަލަމުން ދިޔައެވެ. ފިރިމީހާ ހުރި ހާލު އެއްވެސް މީހަކަށް ސިއްރެއް ނުވާނެއެވެ. ސިގިރެޓް ގަނެގެން ބޭރަށް ނިކުތުމުން އޮޓޯގެ މީޓަރަށް އަރާފައިވާ ވަރު އެހިއެވެ. ޖަވާބުގައި 200 ރުޕީސްކަމަށް ޑްރައިވަރު ބުނުމުން، އަހަރެންގެ އަތުން 200 ރުޕީސް ހޯދާފައި ޑްރައިވަރާއި ދިމާލަށް އެއްލާލިއެވެ. އެއީ އޭނާގެ އަމަލުތައް ހުންނަ ގޮތެއް ނޫނެވެ. އަހަރެންނަށް އެ މަންޒަރު ފެނުމުން ވަރަށް ދެރަވިއެވެ.

ލާރި ލިބުމުން އޮޓޯ އެތަނުން ދިޔައެވެ. އަހަރެން ފިރިމީހާ ކައިރިއަށް ގޮސް ހުއްޓިހުރެ އޭނާ ކޮޅަށް ނެގޭތޯ މަސައްކަތް ކުރީމެވެ. ފިހާރަމީހާ އެ މަންޒަރު ބަލަން ހުއްޓެވެ. ގެއާއި މި ފިހާރަ އާއި ދެމެދު ހުންނާނީ 200 އެއްހާ ފޫޓެވެ. އެހެންކަމުން އަހަރެން ޖެހޭނީ ދެން އޭނާ ގޮވައިގެން ހިނގާފައި ގެއަށް ދާށެވެ. ވަރަށް އުނދަގުލުން އޭނާ ތެދުކޮށްގެން އަހަރެން ހިނގައިގަތީމެވެ. އަހަރެންނަކީ 5 ފޫޓްގެ އިސްކޮޅުގައި 50 ކިލޯ ހުންނަ މީހެކެވެ. ފިރިމީހާ އަކީ 6 ފޫޓާއި އެކު 85 ކިލޯ ހުންނަ މީހެކެވެ. އޭނާ ވެއްޓެން ދާނަމަ އަހަރެންނަށް ހިފެހެއްޓޭނެ ހަމައެއްވެސް ގޮތެއް ނޯންނާނެއެވެ. ފިރިމީހާގެ އަނގަ އެންމެ މިނިޓަކަށް ވެސް ނުހުއްޓައެވެ. ހިނގައިގަނެފައި ފިހާރަމީހާއަށް، އަހަރެންނަކީ އޭނާގެ އަނބިމީހާ ކަމަށާއި ވަރަށް ލޯބިވާނެކަމަށް ބުންޏެވެ. އިނގިރޭސިބަހުން ވާހަކަ ދެއްކުމުން ކީ އެއްޗެއް އެމީހަކަށް ސާފެއް ނުވިއެވެ. އެހެންކަމުން ފިރިމީހާ ބޭނުންވީ ސިންހަޅަބަހުން އަނބިމީހާއަށް ކިޔާނަން ހޯދުމަށެވެ. އަހަރެން ކިޔާދިނުމުން އަނެއްކާވެސް ފަހަތަށް އެނބުރި ފިހާރަމީހާއަށް ގޮވިއެވެ. އަދި އަހަރެން ކިޔާދިން ގޮތަށް ސިންހަޅަބަހުން، އަހަރެންނަކީ އޭނާގެ އަނބިމީހާ ކަމަށް ބުންޏެވެ.

ވަރަށް އުނދަގުލުން ދަމާފައި ކަހަލަ ގޮތަކަށް އަހަރެން ފިރިމީހާ ގޮވައިގެން ކުރިއަށް ހިނގަމުން ދިޔައިމެވެ. ފިހާރަ ހުރީ ގެ ހުންނަ ފަޅިނޫން އަނެއް ފަޅީގައެވެ. އެހެންކަމުން މަގު ހުރަސް ކުރަން ޖެހެއެވެ. ދަންވަރެއް ކަމަކު ކޮންމެވެސް ވަރަކަށް މަގުން އެއްޗެހި ދަތުރުކުރެއެވެ. މިއީ އެންމެ ނުރައްކާތެރި އެއްކަމެވެ. ފިރިމީހާއަށް ކިރިޔާ ހިނގޭކަމެވެ. އަހަރެންގެ ހިތަށް ސިފަވެގެން ދިޔައީ އާޝީޤީ-2 ގައި އަދިތްޔާ ރޯއީ ކަޕޫރު ގޮވައިގެން ޝްރައްދާ އުޅުނު ގޮތެވެ. ކޮންމެއަކަސް މަޑުމަޑުން ހިނގަމުން ގޮސް ގެއަށް ވަދެވިއްޖެ އެވެ. ވަދެވުމާއި އެކު ފިރިމީހާ އޮށޯތީ ސިޓިންގ ރޫމް ޓައިލްތަކުގެ މަތީގައެވެ. ކޮޓަރިއަށް ވަންނާކަށްވެސް އަދި ސޯފާގައި އިށީންނަން ވެސް އޭނާ ބޭނުމެއް ނުވިއެވެ.

ހަދާނެ ގޮތް ހުސްވެގެން ނިތްކުރީގައި އަތް އަޅައިގެން ކައިރީގައި އަހަރެން ވެސް އިށީނީމެވެ. ކުއްލިއަކަށް މި ހާމަވެގެން ދިޔައީ ހާމަ ބޮޑު ކަމެކެވެ. ފިރިމީހާއަކީ މިހެން އުޅޭ މީހެއްކަން ކުރިން އަހަރެންނަށް ނޭނގި އޮތީ ކީއްވެހެއްޔެވެ؟ އަހަރެންގެ އާއިލާއިން އަހަރެން ނިސާރުއާ ކައިވެނިކުރަން ނުރުހޭކަމަށް ބުނި ނަމަވެސް ސަބަބެއް ނުބުނެއެވެ. އާއިލާއަށް މިކަން އެނގިފައި އޮތީ ކަންނޭނގެއެވެ. މިފަދަ މީހަކާއި އެކުގައި ދިރިއުޅުން ކުރިއަށް ގެންދިއުމަކީ ދީނީ ގޮތުން ހުއްދަ ކަމެއް ނޫނެވެ. އަނެއްކޮޅުން އަހަރެންގެ އާއިލާއަށް އަހަރެން ދޭނީ ކޮން ޖަވާބެއް ހެއްޔެވެ.؟ އަހަރެންނަށް ކިޔަވާދީ އަހަރެންނަށް އިތުބާރުކޮށްފައި ބޭރުގައުމެއްގައި ބެހެއްޓީތީ އެމީހުނަށް ދޭން އޮތް ޚަބަރަކީ މިއީ ހެއްޔެވެ؟ ސޯފާގައި ލެނގިލައިގެން މިހެން ވިސްނާ އިންދާ އަހަރެންނަށް ވެސް ނިދިއްޖެއެވެ. ހޭލެވުނީ އަލިވުމުންނެވެ. އޭރުވެސް ފިރިމީހާ އޮތީ ނިދިފައެވެ. ގައިގެ ބައެއް ތަންތަނުގައި ކުދި ޒަޚަމްހުއްޓެވެ. ހިރަފުސް ފާރެއްގައި ޖެހިފައި ހުރި ކަހަލަ ގޮތަކަށް ޓީ.ޝަރޓް ހަޑިވެފައި ހުއްޓެވެ. އޭނާއަށް ހޭލެވުނީ 8 ޖަހަނިކޮށެވެ. އޭރު ރޭގައި ކަން ހިނގި އެއްވެސް ގޮތެއް އޭނާގެ ހަދާނަކު ނެތެވެ.

މީގެ ފަހުން މިކަން ވީ އާދައަކަށެވެ. ކޮންމެ 3 ދުވަހުން ނުވަތަ 4 ދުވަހުން އަހަރެންނަށް ފެންނަނީ މުޅިން އެހެން ފިރިއެކެވެ. މަސްތުގެ ކަނޑަށް ޣަރަގުވެފައިވާ މީހެކެވެ. އެ ހާލަތުގައި ހުރެ ރުޅިއައިސްގެން ވަރަށް ހަޑި އެއްޗެހިކިޔައެވެ. ނަމަވެސް އަނިޔާއެއް ނުކުރެއެވެ. ރަގަޅުވުމުން ރޮއިފައި އާދޭސްކޮށް މާފަށް އެދެއެވެ. ފިރިމީހާ ދޫކޮށް ނުދިއުމަށް އެދި ފައިގައިވެސް ހިފައިގެން އާދޭސްކުރެއެވެ. އަހަރެން ހަދަންވީ އެއްވެސް ގޮތެއް ނޭނގެއެވެ. އަހަރެންނަކީ އެއްވަގުތަކު ދެ ފިރިންނާއި އެކުގައި އުޅޭ މީހެއް ފަދަ އެވެ. މުޅިން ތަފާތު ދެމީހުންނެވެ. އެކަކާއި އެކުގައި ފެންނަނީ އުފަލާއި އުއްމީދުން ފުރިގެންވާ މުސްތަގުބަލެކެވެ. އަނެކަކާއި އެކުގައި ފެންނަނީ މާޔޫސްކަމާއި އަދިރިކަމެވެ. ދުނިޔެ ނުލިބުން ތަނުގައި އާޚިރަތްވެސް ގެއްލޭނެކަމުގެ އިހްސާސެވެ. މިވަގުތަށް މިކަން އަހަރެންނަށް ސިއްރުކުރެވިދާނެ އެވެ. ނަމަވެސް ކޮވިޑްގެ ހާލަތުން އަރައިގަނެ ދަތުރުފަތުރުކުރުން ހުޅުވާލުމުން އަހަރެންގެ އާއިލާގެ މީހުންވެސް އަންނާނެއެވެ. އޭރުން އަހަރެން ނުބުނި ނަމަވެސް އެމީހުނަށް ފެންނާނެއެވެ. އަހަރެން ދޭނެ ޖަވާބެއް ނެތެވެ.