މަސްތުވާތަކެއްޗަކީ އަޅުގަނޑުމެންގެ މުޖުމަތަޢުއަށް ޖެހިފައިވާ އެންމެ ބޮޑު މުސީބާތޭބުނުން ގޯހެއް ނުވާނެއެވެ. ހުރިހާ ނުބައި ކަމެއްގެ މަންމަ އަކީ ރަލޭ ބުނެވެއެވެ. އެހެންކަމުން އަޅުގަނޑުމެންގެ މުޖުތަމަޢުގައި މިއޮތް މަސްތުކަން ފިލާގޮސްފިނަމަ ޒުވާނުންނަކީ ބިނާކުރަނިވި އަދި ވަރަށް އުފެއްދުންތެރި ބަޔަކަށް ވެގެންދާނެއެވެ. މަސްތުވާތަކެތީގެ އަވާގައި ޖެހިފައިތިބި ޒުވާނުންނަކީ ވެސް ވަރަށް ހުނަރުވެރި ބައެއްކަން އެނގެނީ އެމީހުންގެ މަސައްކަތް ދައްކާލުމަށް ބޭއްވޭ މައުރަޒުތަކުންނެވެ. އެހެންކަމުން މިވަބާއިން ސަލާމަތްވެ މުޖުތަމަޢުގައި މަސައްކަތްކުރަން ފުރުސަތުލިބުމުން އެމީހުންގެ އެ ހުނަރު ގައުމަށް ބޭނުން ހިފޭނެއެވެ.

ރާއްޖޭގައި މަސްތުވާތަކެއްޗަށް ދެވިހިފާފައިވާ މީހުންގެ ތެރޭގައި އެކަމުން ސަލާމަތްވާ ބޭނުންވާ ވަރަށް ގިނަ ބަޔަކު އެބަ ތިއްބެވެ. ނަމަވެސް އެކަމަށް ބޭނުންވާ އެހީތެރިކަމާއި ވަސީލަތް ނުލިބި ނުވަތަ ހޯދާނެ ގޮތެއް ނޭނގިފައި ތިބި ފަރާތްތައް ވަރަށް ގިނަ އެވެ. ރާއްޖޭގައި ހިންގާ ރިހެބިލިޓޭޓް ޕްރޮގްރާމްއާއި މެދު އެއްޗެއް ބުނާކަމަށް ނެތީމެވެ. ނަމަވެސް ނަތީޖާއޮތީ އެންމެންގެ ކުރިމަތީގައި ފެންނާށެވެ. ދިވެހި ޒުވާނުންގެ ތެރެއިން މިކަމަށް ފަރުވާ ހޯދުމަށް ރާއްޖެއިން ބޭރަށް ދަތުރުކުރާ ފަރާތްތައް ވެސް އުޅެއެވެ. ފޯރާ އާއިލާތަކަށް ނިސްބަތްވާ ކުދިން މިހިސާބުގެ އެކި ގައުމުތަކުން ފަރުވާ ހޯދައެވެ. އެގޮތުން ސްރީލަންކާގައި ހުންނަ މިފަދަ މަރުކަޒަރަކަށް ޒިޔާރަތްކުރުމުގެ ފުރުސަތު ލިބުމުން އެތަނާއި ބެހޭ މައުލޫމާތު ކޮޅެއް ހިއްސާކޮށްލާނަމެވެ. ބޭނުންޖެހިފައި ހުރި އާއިލާއަކަށް އެހީއަކަށް ވެދާނެ ކަމުގެ އުއްމީދުގައެވެ.

ރިހެބިލިޓޭޝަން ސެންޓަރެކޭ ބުނުމުން ގިނަ ބައެއްގެ ހިތަށް ސިފަވަނީ މިނިވަންކަން ގެއްލި ބަންދުވެފައިވާ ތަނެއްގެ ގޮތުގައެވެ. އަޅުގަނޑަށް ވެސް ވީ ހަމަ އެހެންނެވެ. އެތަނުގެ އިސްފަރާތުން ދީފައިވާ އެޑްރެސް ހޯދައިގެން ދަތުރު ފެށީމެވެ. އެއީ ދިވެހިން އެންމެ ގިނައިން އުޅޭ ދެހިވަލަ، ކަޅުބޯވިލާ އާއި 45 މިނިޓް ނުވަތަ 1 ގަޑިއިރުގެ ދުރުގައިވާ މާލަބޭގައި ހުރިތަނެކެވެ. މާލަބެއަކީ ދެހިވަލަ ސަރަހައްދާ އަޅާކިޔާނަމަ މީހުން މަދު، އުމްރާނީ ތަރައްގީ ކުޑަ ނަމަވެސް ވަށައިގެން ފެހިކަން ފެންނަން އޮންނަ ހިސާބެކެވެ. ވަރަށް ހަމަ ހިމޭން ތަނެކެވެ. މަރުކަޒު ހަދާފައި ހުރީ ދެފަންގިފިލާއަކަށް ހުރި އިމާރާތެއްގައެވެ. ތަނުގެ އިސްވެރިއަކަށް ހުރީ ލަންކާގެ މަޝްހޫރު ހޮސްޕިޓަލެއްގައި ނަރުހެއްގެ ވަޒީފާ އަދާކުރާ ޒުވާނެކެވެ. ޒުވާނުންނާ ގުޅޭ ހިތްހެޔޮ މިޒާޖެއްގެ އަންހެނެކެވެ.

ފަހަތުން އައުމަށް އިޝާރާތްކޮށްފައި ގޭތެރެއަށް ވަނުމުން އަޅުގަނޑުވެސް ފަހަތުން ގޮސް ވަނީމެވެ. ސިޓިންގ ރޫމްގައި 4 މީހަކު ކެރެމް ކުޅެން ތިއްބެވެ. އެތަނުން އެކަކުގެ ބަރުދަން 130 ކިލޯއަށްވުރެ މަތިވާނެ ކަމަށް ބެލެވެއެވެ. މިތަނުގައި ފަރުވާ ހޯދާ ގިނަ މީހުންނަކީ ބަނގުރަލަށް ދެވިހިފާފައިވާ ވުމުން ފަރުވާ ހޯދާމީހުންނެވެ. ބަނގުރާބޭނުންކުރާ މީހުންގެ ތެރޭގައި މިހެން ބަރުދަން އިތުރުވުމަކީ އާންމު ކަމެއް ކަމަށް އެތަނުގެ ވެރިޔާ ކިޔާދިނެވެ. ކައިރީގައި އިން ސޯފާގައި އިށީނދެގެން އެހެން މީހަކު އިނެވެ. އޭނާއަށް ވަނީ ޖިސްމާނީ ގެއްލުމެއް ވެސް ލިބިފައެވެ. ނާރުތަކުގެ މައްސަލައެއްޖެހި އަތާއި ކަނދުރާގެ ސީދާކަން ވަނީ ގެއްލިފައެވެ. މަޑު ތުރުތުރެއް އޭނާގެ ހަށިގަނޑުގައި ހުއްޓެވެ.

މިފަދަ ތަނަކަށް ދާންޖެހިފައިވާ މީހެއްގެ ނަޒަރުން ވިސްނާލީމެވެ. ކުރިމަތިން މި ފެނުނު ކަންކަމުންވެސް އެއް ފިޔަވަޅުފަހަތަށް އެޅޭވަރު ވެއެވެ. އެއް ކަމަކީ އަމިއްލަ ގެ ދޫކޮށްލުމަށްފަހު އެހެންތަނަކަށް ބަދަލު ވުމެވެ. ފަރުވާ އަށެވެ. އަނެއްކަމަކީ ބަދަލުވާތަނުގެ މާހައުލުން މި ފެނުން ކަންކަމެވެ. ވަރަށް ހިތްވަރު ގަދަ މީހަކަށް ނޫނީ މިތަނަށް އަންނަން އެއްބަސް ނުވެވޭނެއެވެ. ނަމަވެސް މިއީ އަދި ފެށުމެވެ. މިތަނާއި ބެހޭ އިތުރު މައުލޫމާތު ހޯދާލަން ވެރިމިހާއާއި އެކުގައި ހިނގައި ގަތީމެވެ. އޭނާ ދެއްކީ އެތަނުގައި ހުސްކޮށް ހުރި ކޮޓަރިއެކެވެ. ދެމީހުންނަށް ނިދޭގޮތަށް ދެ އެނދު ބަހައްޓާފައި ހުއްޓެވެ. ދެން ހުރީ ދެދޮރުފަތްލީ އަލަމާރިއެކެވެ. އިތުރު އެއްޗެއް ނެތެވެ. ތަނުގެ މައުލޫމާތު ސާފުކޮށްލުމަށް އޭނާއާއި ވާހަކަ ދައްކާލުމުން އެނގުނީ އެތަނުގައި މަނާ ކަމަކީ ހަމަ އެކަނި މަސްތުވާތަކެތި ނުވަތަ ބަނގުރާ ބޭނުން ކުރުން ކަމެވެ. އޮންލައިކޮށް މަސައްކަތް ކުރާ މީހުނަށް އެފުރުސަތު އެބައޮތެވެ. އޮންލައިން ގޭމްކުޅުމާއި ޔޫޓިއުބް ކޮންޓެންޓް ހަދާ މީހުނަށް އެކަން ފަހިވެފައި އޮވެއެވެ. ސިގިރެޓް ވެސް ގޭގެ ގޯތި ތެރޭގައި ބޮވެއެވެ. ސިގިރެޓުން ދުރުކުރުމަކީ ދެވަނަ ފިޔަވައްސެއްގެ ގޮތުގައި ކުރިއަށް ގެންދާ ކަމެކެވެ.

އަގުތަކާއި ބެހޭގޮތުން ސުވާލުކޮށްލުމުން ބުނީ ދެމީހުންގެ ހިއްސާކުރާ ކޮޓަރިއެއް ނަމަ މީހަކަށް މަހަކަށް 70 ހާސް ރުޕީސް އާއި ޑޮކްޓަރުގެ ފީއަށް 30 ހާސް އަރާނެކަމަށެވެ. މިއީ އެއަރކަންޑިޝަން ހުންނަ ކޮޓަރި އެއް ނޫނެވެ. އެއަރ ކަނޑިޝަން ހުންނަ ކޮޓަރި ވެސް އެބަހުއްޓެވެ. އެކޮޓަރީގެ އަގު 10 ހާސްވަރު ބޮޑެވެ. ކޮޓަރި އެއްކޮށް ނަގައިގެން އާއިލާގެ މީހަކު ނުވަތަ ރައްޓެއްސަކާއި އެކުގައި ހުންނަން ބޭނުން ނަމަ އެ ފުރުސަތުވެސް އެބައޮތެވެ. މިހިސާބުން އެތަނަކީ ޖަލެއް ކަމަށް ވެދާނެ ކަމަށް ކުރެވުނު ހީ އަކީ ކުށްހީއެއް ކަމަށް ނިންމައިފީމެވެ.

މިއީ ހަމަ ހުރެލަން ރަގަޅު ތަނެކެވެ. މުސްތަޤްބަލު އުޖާލާކޮށް ބަނަކަން ފިލުވާލުމަށް މިފަދަ ތަނެއްގައި މަޑުކޮށްލުން ހަމަ ރަގަޅެވެ. ފަރުވާގެ ވާހަކަވެސް ކިޔާދިނެވެ. މަސްތުވާތަކެއްޗަށް ދެވިހިފުން ދުރުކުރުމަށް ފުރަތަމަ ދެވޭ ފަރުވާ އަކީ އެތަނުގައި ހޭދަވާ އެންމެ ފުރަތަމަ 3 ދުވަހު ދެވޭ ފަރުވާއެކެވެ. ޑޮކްޓަރުގެ ސީދާ ބެލުމުގެ ދަށުން ދެވޭ މިފަރުވާއަކީ ހަށިގަނޑުން ވިހަ ބޭރުކޮށް މަސްތުވާއެއްޗެއްސަށް ހިތްޖެހުން ކުޑަކުރުމަށް ދެވޭ ފަރުވާއެކެވެ. އޭގެ ފަހުން ޑޮކްޓަރު ދީފައި ހުންނަ ބޭސް ގަޑިން ގަޑިއަށް ކެއުމުން ނިމުނީއެވެ. މިތަނުގައި ހުންނަން ޖެހެނީ މާހައުލު ބަދަލު ކުރުމަށެވެ. މިތަނުގައި ހުންނަ މުއްދަތުގެ ތެރޭގައި އިތުބާރު ހިފޭ އަދި ޒިންމާ ނެގޭވަރުގެ މީހަކާއި އެކުގައި ބޭރަށް ވެސް ދެވޭނެއެވެ. އެހެންކަމުން މިއީ އުނދަގޫ ކަމެއް ނޫނެވެ.

ފަރުވާގެ ނަތީޖާއަކީ އެންމެ މުހިންމު އަދި ގިނަ ބަޔަކަށް ޖަވާބު އެނގެން ބޭނުންވާ ސުވާލެވެ. މިތަނުގެ ފަރާތުން ހާމަކުރި ގޮތުގައި އެތަނުން ފަރުވާގެ ފުރަތަމަ މަސް ފުރިހަމަ ކުރުމަށްފަހު ދެން އަމިއްލައަށް 6 މަސް ވަންދެން މަސްތުވާތަކެއްޗާ ދުރުގައި ތިބި މީހުން އެކަމަށް ހިފާފައިވާ ދެވި އެއްކޮށް ފިލާފައި ވެއެވެ. އަދި އޭގެ ތެރެއިން ގިނަ ބަޔަކު ރަގަޅު ވަޒީފާތަކުގައި، އާއިލާ ބިނާކޮށްގެން ދިރިއުޅެމުން ދެއެވެ.

ގޭގެ މަތީ ފަންގިފިލާއަށް ވެސް އަރާލީމެވެ. މިއީ ކުޑަ އާއިލާއެއް ދިރިއުޅޭ ގެއެކެވެ. ތަނުގެ ވެރިމީހާގެ ފިރިމީހާ އިނީ އެތަނުން ފަރުވާ ހޯދާ މީހުނާއެކުގައި ކެރަމް ކުޅޭށެވެ. ދެމަފިރިންގެ އިތުރުން މި ތަނުންގެ އެކަކު މަންމަ އަދި ގޭގައި މަސައްކަތް ކުރާ އަންހެނަކު ވެސް ހުއްޓެވެ. ދެމަފިރިންގެ 7 އަހަރުގެ ކުޑަ ފިރިހެން ކުއްޖަކުވެސް އުޅެއެވެ. މިއީ ވަރަށް އެކުވެރި މާހައުލެކެވެ.

މިއީ ވަރަށް ބޮޑު އުއްމީދެކެވެ. އާއިލާތަކުން ކުރަމުންދާ ހިތާމައަށް މިކަމުން ލުޔެއް ލިބިދާނެއެވެ. މަރުވާނެ އިރެއް ހަމަ އެކަކަށް ވެސް ނޭނގޭ ފަދައިން ފަހުން މަސްތުކަމުން އަރައިގަންނަން ހުރެގެން ވަގުތު ފާއިތު ވެދާނެއެވެ. މަސްތުވާ ތަކެއްޗަށް ދެވިހިފުމަކީ ބައްޔެކެވެ. އެކަމަށް ފަރުވާ ހޯދޭނެއެވެ.