ރިފާއަކީ ހީވާގި ހިތްތިރި އަދި އެހާމޭ އޯގާތެރި ނަރުހެކެވެ. ގައުމަށް ދިމައިވެފައިވާ ކޮވިޑުގެ މި ދަތި ހާލުގައި ރިފާ ހިތްވަރު ކުރަނީ އެ ފަކީރުގެ އެންމެ ފުރިހަމަ އަށެވެ. ކޮންމެ ދުވަހެއްގެ 8 ގަޑި ޑިއުޓީ ދިގުލައިގެން ގޮސް 12 ގަޑި އިރަށް ދެމިގެން ދާއިރުވެސް އަނގައިން ޗުއްޕުސް ބުނެއެއްނުލައެވެ. ޝަކުވާގެ ރާގަކަށް ދޫ ތަޅުވާވެސް ނުލައެވެ.

ރިފާ މަސައްކަތް ކުރަމުން އަންނަނީ ކޮވިޑް ގެ ބަލިމީހުން އެނދުމަތިކޮށްފައި ހުންނަ ހުޅުމާލޭ ފެސިލިޓީގައެވެ. އެތަނުގައި އޭނާ މަސަތްކަތް ކުރާތާ ތިން މަސް ވެއްޖެއެވެ. ރިފާ އާންމުކޮށް ޑިއުޓީ ކުރަނީ އައި.ސީ.ޔޫގައެވެ. ފާއިތުވި ދެ މަސްދުވަހު އެ އައި.ސީ.ޔޫއިން މަރުވި މީހުންގެ އަދަދު ވަރަށްވެސް މަދެވެ. ނަމަވެސް ހިތާމަ އަކީ އަދުގެ ހާލަތު މުޅިން ބަދަލުވުމެވެ.

ކޮންމެ ދުވަހަކީ އެ އައިސީޔޫގައި ފުރާނައެއް ނެތިގެންދާ ދުވަހެކެވެ. ރިފާގެ ޑިއުޓީ ގަޑިތަކުގައިވެސް ބައެއް ދުވަސް ދުވަހު މިފަދަ ހިތްދަތި ހާދިސާތައް ކުރިމަތިވެއެވެ. ނަމަވެސް މިއަދަކީ އަދި މުޅިން ތަފާތު ދުވަހެކެވެ.

މާލޭގެ އުތުރު ފަރާތުގައި ހުންނަ ހަ ބުރީގެ އިމާރާތަކުން ފައިބައިގެން އަވަސް ހިނގުމެއްގައި ރިފާ ހިގަމުން ދިޔައީ އައިޖީއެމްއެޗް އާއި ދިމާލަށެވެ. އޭރު ގަޑިން ހަގަޑި ބައިވެދާނެއެވެ. އެ އަވަސް ހިނގުމުގައި ހަތެއް ޖެހުމުގެ ފަސްމިނެޓުކުރިން ރިފާއަށް ހޮސްޕިޓަލަށް ވަދެވުނެވެ. ހޮސްޕިޓަލުގެ ޕޯޓިކޯ ދޮށުގައި މަޑުކޮށްލައިގެން ހުރީ ހުޅުމާލޭ ފެސިލިޓީއަށް ދިއުމަށެވެ. އާދައިގެ މަތިން މިއަދުވެސް އެ ފެސިލިޓީއަށް ދިއުމަށް 10 ވަރަކަށް ނަރުހުން ނުކުމެ ތިއްބެވެ. ރިފާ ދަންނަ ނަރުހުންނާއި ނުދަންނަ ކުދިންވެސް ތިއްބެވެ.

ގަޑިން 7 ޖެހުމާއެކު، ވޭން އައިސް މަޑުކޮށްލިއެވެ. އެންމެންވެސް ވޭނަށް އަރާ ހަމަޖެހިލިއެވެ. ރިފާވެސް ވޭނުގެ އެންމެ ފަހަތު ސީޓުގައި ހަމަޖެހިލީ ގައުމީ ހިދުމަތަށް ކަމަރު ބަނދެލަމުންނެވެ. އިސާހިތަކު ބުރިޖާއި ހައިވޭ ކަޑައްތުކޮށް ހުޅުމާލޭ ފެސިލިޓީގެ ތެރެއަށް ވޭން މަޑުކޮށްލިއެވެ. އެންމެންވެސް ފައިބައިގެން ދިޔައީ އެތަނުގައި ލުމަށް ހަމަޖެހިފައި ހުންނަ "ސްކްރަބެއް" (ވަކި ހާއްސަ ހެދުމަކާއި ހަރުވާޅެއް) ލުމަށެވެ. ގަޔަށް ހެޔޮވަރު ސްކްރަބެއް ނަގައިގެން ރިފާވެސް މިސްރާބު ޖެހީ، އެއްޗެހި ބަދަލުކުރާ ކޮޓަރިއާދިމާލަށެވެ.

"ކޮބާ ރިފާ، މިއަދުވެސް މޯނިންތަ" މަރީ އަހާލިއެވެ. ރިފާ ހިނިތުންވެލާފައި އާނއެކޭ ބުނެލިއެވެ. "މިއަދު އިންޝާ ﷲ މަރެއް ނުދައްކަވާށި" މާޔޫސް ހިތަކައިގެން މަރީ ބުނެލިއެވެ. "ތިހެން އުންމީދުކޮށް ދުއާކޮށްގެން ކޮންމެ ދުވަހަކު މަ މިއަންނަނީ.. އެކަމަކު..." ރިފާގެ ދޫ ޒާތަކަށް ގޮއްޖެހުނު ކަހަލައެވެ. އޭނާއަށް ބުނެވުނީ އެހިސާބަށެވެ. މޫނުމަތިން އަނދިރިގަނޑެއް ފެނުނު ކަހަލައެވެ. ނުބައި ކަމެއްގެ ހިލަމެއް އިހުސާސް ކުރެވުނުހެން އޭނާއަށް ހީވިއެވެ. "ކީއްކުރާނީ ދޯ... ރިފާ ވަންނަގަ!" މަރީ ބުންޏެވެ. ބޯޖަހާލުމަށް ފަހު އެއްޗެހި ބަދަލުކުރަން ރިފާ ވަނެވެ.

ސްކްރަބް ލައިގެން ނުކުމެ، ރިފާގެ މިސްރާބު ދެން ހުރީ ޕީޕީއީ އަޅާ ކޮޓަރިއާ ދިމާލަށެވެ. އެތަނަށް ވަދެ އެތަނުގައި ޕީޕީއީ އެޅަމުން ދިޔައީ ދެންވެސް އެތަނުގާ ތިބި ނަރުހުންނާ ވާހަކަ ދައްކަމުންނެވެ. އެހެން ނަރުހުންގެ ކިބައިން މިއަދުވެސް ފެނިގެން ދިޔައީ އުންމީދާއި ހިތްވަރުގެ ކުލަތެކެވެ. ރިފާއަކީ އެހެން ދުވަސް ދުވަހު އެފަދަ އުންމީދަކާއިގެން އަންނަ ނަރުހެކެވެ. ނަމަވެސް މިއަދު އޭނާގެ ދޫ އޮޅުނު ހިސާބުން އެފަކީރުގެ ހިތުގައި ޖަހަމުން ދިޔަ ހިތްވަރާއި އުންމީދުގެ ވިންދު ޒާތަކަށް ކަސިޔާރުވެއްޖެއެވެ. ޕިޕީއީ އަޅައިގެން ރިފާ ފެސިލިޓީގެ އެންމެ އެތެރެ ދޮރުހުޅުވާލާ އައިސީޔޫއާއި ދިމާލަށް މިސްރާބު ޖެހިއެވެ. އަައިސީޔޫއަށް ވަދެވުނުއިރު ހަތްގަޑިތިރީސްފަހެއް ހިނގައިފާނެއެވެ. އެހެންދުވަސްތަކާއި ހިލާފަށް މިއަދު، އެންމެ އެނދެއް ފިޔަވާ ހުރިހާ އެނދެއް ހުރީ ފުރިފައެވެ. ވެލްޓިލޭޓަރުގައި 7 މީހުން އެބަ އޮތެވެ.

ޑިއުޓީބަދަލުވަމުން ހޭންޑްއޯވާ ނަގައިފިއެވެ. ރިފާއަށް ލިބުނީ ދެ ޕޭޝަންޓުންނެވެ. އެކަކު އޮތީ ވެންޓިލޭޓަރުގައެވެ. އަނެކަކު އޮތީ "ކޮންޓިނުއަސް ބައިޕެޕް" ގައެވެ. ރިފާގެ އުންމީދީ ވިންދު ކަސިޔާރު ވެފައިހުއްޓަސް އެފަކީރު އަލުން އެ ހިތްވަރު ގެނައީ މަސައްކަތު މާހައުލުގެ ތެރެއިންނެވެ.

"ރިފާ!" ފަހަތުން މީހަކު އައިސް ރިފާގެ ކޮނޑުގައި އަތްޖަހާލިއެވެ. ޕީޕީއީ ގައި ތިބޭއިރު ކާކުކަން ވަކި ކުރާކަށް ނޭނގެއެވެ. އެހެންކަމުން ޕީޕީއީގެ ކުރިމަތީގައްޔާއި ފަހަތުގައި މާކަރުން ނަންލިޔެފައި ހުރެއެވެ. ރިފާ އެނބުރި ބަލާލި އިރު އެއީ މަރީއެވެ. "މަވެސް އައިސީޔޫ އޭ މިއަދު، ކޮން ބެޑެއްތަ ލިބުނީ؟" މަރީ އަހާލިއެވެ. "3 އެންޑް 4" ރިފާ ބުންޏެވެ. "އޯކޭ ގުޑްލަކް! މަގޭ އަނެއްފަޅިން 9 އާ 6، އަދިވެސް ނޯޓްސް ނުލިޔަން، ދަނީ އިނގޭ" އަވަސްރާގެއްގައި މަރީ ބުންޏެވެ.

ދުވަހުގެ މަސައްކަަތައިގެން ރިފާ ކުރިއަށް ދިޔައެވެ. މެންދުރު 12 ޖެހުމުގެ ކުރިން ރިފާގެ ދެ ޕޭޝަންޓުންނަށް ކާންދީ އަދި ފެންވަރުވާވެސް ހެދިއެވެ. ދެންވެސް އެހެން ހުރި ކަންކަން ބަރާބަރަށް ކުރަމުން ދިޔައެވެ. ވެންޓިލޭޓަރުގައި އޮތް ޕޭޝަންޓަކީ ހަށިގަނޑުން ބޮޑު ޖާނުން ވަރުގަދަ 78 އަހަރުގެ ކާފައެކެވެ. ދެން އޮތީ 56 އަހަރުގެ ބޭބެއެކެވެ. އިތުރު އެހެން ނަރުހަކާއި އެކު ދެ މީހުން ފެންފަރުވާ ނިމުނުއިރު އެފަކީރު ދާހިއްލާ ފޯވެއްޖެއެވެ. ވަރުބަލިވެ ކަރުހިތްކައިގަނެއްޖެއެވެ. ނަމަވެސް އެކަމުގެ އިހުސާސް މުޅިންހެން ރިފާގެ ހިތުން ފޮހެލި ކަހަލައެވެ. އަނެއްކާވެސް މަސައްކަތައިގެން އެނބުރުނެވެ.

(1/2 ބައި)