ް12 ޖަހާއިރުގެ ބޭސްތައް ދިނުމަށް ރިފާ އަވަސްވެގަތެވެ. ސިރިންޖުން ދޭން ޖެހޭ ބޭސްތަށް ސިރިންޖަށް ނަގަމުން ދިޔައީ ބޭސް ތަކުގެ ބާރާއި ނަގަންޖެހޭ މިންވަރުގެ ހިސާބުތައް ހަދަމުންނެވެ. އެ ގަޑީގެ ބޭސްތައް ދިނުނަށް ފަހު ރިފާ ހަމަޖެހިލީ އަދި ކިރާއެވެ. ފައިލުގާ ނޯޓުތައް ލިޔުމަށް ރިފާ ގޮނޑީގައި އިށީނދެލައިގެން އިނެވެ.

އިރުކޮޅެއް ފަހުން ރިފާގެ ޕޭޝަންޓުގެ މޮނީޓަރުން އެލާމު އަޅަން ފެށިއެވެ. އެއީ ވެންޓިލޭޓަރުގައި އޮތް ކާފައެވެ. ރިފާ އަވަސް އަވަހަށް އެދިމާލަށް ދިޔައެވެ. އެ އެނދާއި ކައިރީގައި ހުރި އެހެން ދެ ނަރުހަކުވެސް އެ ދިމާލަށް ގާތްވެލިއެވެ. މޮނީޓަރުން ދައްކަމުން ދިޔަ ސެޗުރޭޝަން (އޮކްސިޖަން) ދަށްވާން ފެށިއެވެ. 60 ހުން ގޮސް 45 ހަކަށް ދައްވަމުން ދިޔައެވެ. އެވަގުތު އައިސީޔޫގައި އުޅުނު ޑަކްޓަރުވެސް އެ ތަނަށް އައެވެ. 

އެ ކާފަގެ ބީޕީ (ލޭގެ ޕުރެސަރު) ދައްވާން ފެށިއެވެ. ހިތުގެ ވިންދު ކުއްލިއަކަށް އަވަސް ވާން ފެށިއެވެ. އެހިސާބުން ޑަކްޓަރު އެކި އެކި ބޭސް ތަަކުގެ ނަންތައް ކިޔަން ފެށިއެވެ. ރިފާ އަވަސްވެގަތީ އެބުނާ ބޭހެއްގެ އެބުނާ މިންވަރެއް ނަގައިގެން އެ ކާފައަށް ދޭށެވެ. ނަމަވެސް އެއްވެސް ބޭހެއް ދޭނޭ ވަގުތެއް ނުލިބި އެ ކާފަގެ ވިންދު ކުއްލިއަކަށް ގެއްލިއްޖެއެވެ. ސެޗުރޭޝަން ވެސް ގެއްލިއްޖެއެވެ. ނަމަވެސް ޑަކްޓަރުގެ ބަހަށް ރިފާ އެތަނުން ބައެއް ބޭސްތަށް ދިނެވެ. ނަމަވެސް އެއިން އެއްޗެއްގެ އަސަރު ދައްކާ ގޮތެއް ނުވިއެވެ.

"ސްޓާރޓް ސީޕީއާރް.. ފާސްޓް! ފާސްޓް!" ޑަކްޓަރު ބުންޏެވެ. އެވަގުތު އެތަނުގައި ހުރި އެހެން ނަރުހަކު ސީޕީއާރު ދޭން ފެށިއެވެ. އެހިސާބުން ހިތުގެ ވިންދު ކުޑަކޮށް ދައްކާލިއެވެ. ނަމަވެސް ހިފެހެއްޓުމެއް ނެތެވެ. ސީޕީއާރުގެ ތަރުތީބުން ސީޕީއާރު ދެމުން ދިޔައެވެ.

 އެނދުކައިރީގައި ހުރި ރިފާ އޭނާގެ ހިތުން ދުޢާ ކުރަމުން ދިޔައެވެ. މަޑު މަޑުން އޭނާގެ ލޮލަށް ކަރުތައް ޖަމާވަމުން ދިޔައެވެ. އެހާލޯބިން މިއަދު ރިފާ ބަލަމުން ދިޔަ އެ ކާފަ މަރުވާކަށް ރިފާއެއް ނޭދެއެވެ. ރިފާއާއި އާއިލީ ގޮތުން ގުޅުމެއް ނެތަސް އެއީ ހަމަގައިމުވެސް ކޮންމެވެސް ބައެއްގެ ކާފައެކެވެ. ބައްޕައެކެވެ. ބޭބެއެކެވެ.

މި ހިތްދަތި ކަމުގައިވެސް ރިފާ ކެތްކުރަމުން ދިޔައެވެ. ސީޕީއާރަށް ފަހުވެސް އެއްވެސް އަލިމަގެއް ނުފެނުމުން ޑަކްޓަރު ލަފާދިނީ އީސީޖީ ނަގާށެވެ. އެކަމާ އަވަސްވެގަތީ ރިފާއެވެ. އީސީޖީގެ ލީޑުތައް ގުޅާ، މެށިނަށް ފިތާލީ މާތް ﷲ އަށް ވަކީލުކޮށްލާފައެވެ. އެ މެޝިނުގެ ތެރެއިން ކުރެހެމުން ނުކުތް އީސީޖީ ކަރުދާހުގައި ވަނީ ކޫރުމެއް ގުދުކަމެއް ނެތް ސާފު ތެދު ރޮނގެކެވެ. "إِنَّا لِلّهِ وَإِنَّـا إِلَيْهِ رٰجِعونَ" ކަރުނަތަށް ކޯތާފަތްމައްޗަށް އޮހިގެން ދިޔަ ހާލު ރިފާއަށް ބުނެވުނެވެ.

"ކްލިއާރ ދަ ޕޭޝަންޓް އެންޑް ގިވް ޑެތްކެއާރ، އަންގަން ޖެހޭ ފަރާތްތަކަށް އަންގާލަ!" ޑަކްޓަރު ބުންޏެވެ. ރިފާ އެގޮތުގެ މަތިން އަމަލު ކުރަންފެށިއެވެ. ނޭފަތް ދަމަމުން ގަދަ ހިތްވަރާއި އެކީ އެ ކާފަ އަށް ގުޅާފައި ހުރި ހުރިހާ ހޮޅިތަކެއް ނައްޓާލިއެވެ. އަދި ރީއްޗަށް ފެންވަރުވާލާ ހަށަމަށް އަތް ބަނދެލާ އައްސާލިއެވެ. ރީނދޫ ކުލައިގެ ބޯ ފޮތިގަނޑަކުން އެ ކާފަގެ ފުރާނަ ނެތް މަސްގަނޑު ފޮރުވާލުމަށްފަހު އައިސީޔޫއިން ބޭރަށް ނެރެވުނު އިރު ގަޑިން 2 ޖަހާފާނެއެވެ.

އެ މާޔޫސްކަމާއި ގަބުކަމުގައި ރިފާއަށް ހުރެވޭކަން ނެތެވެ. ރިފާގެ އަނެއް ޕޭޝަންޓުގެ ބޭސްދޭ ގަޑި ޖެހުނީއެވެ. އަނެއްކާވެސް މަސައްކަތަށް ރިފާ އެނބުރިގަތެވެ. އެ ބޭބެއަށް ބޭސް ދިނުމަށް ސިރިންޖަށް ބޭސްތަށް ނަގަމުން ދިޔައީ ހިތްވަރާއި ސާބިތުކަން މަތީގައެވެ. ކުއްލިއަކަށް ރިފާއަށް ސިހުނީ އެ ބޭބެގެ މޮނީޓަރުން އެޅި އެލާމާއި އެކުގައެވެ. ރިފާއަށް ދުވެފާކަހަލަ ގޮތަކަށް އެދިމާލަށް ދެވުނެވެ. އެ ބޭބެގެ ސެޗުރޭޝަން ހުރީ 25 ގައެވެ. ނަމަވެސް އޮކްސިޖަން އިތުރުކުރަން ކުރެވޭނޭ އިތުރު ކަމެއް ރިފާގެ ސިކުނޑިއަށް އެވަގުތަކު ނައެވެ. ބޭބެ އޮތީ 15 ލީޓަރު އޮކްސިޖަންގައި ބައިޕެޕް ގުޅާފައެވެ. ބޭބޭގެ ދެލޯ ހުރީ ބޮޑުވެފައެވެ. އަތްފައި ތުރުތުރު އަޅާފައެވެ.

"ބޭބެ އަރިކޮއްލަބަ.. އަރިއަކަށް ބާއްވާލަބަ ރިފާ!" ދުރުގައި ހުރީ މަރީ ރިފާ ގާތަށް ޖެހިލާފައި ބުނެލިއެވެ. އެވަގުތު އެތަނަށް އެހެން ނަރުހުންވެސް ޖަމާވިއެވެ. އެ ބޭބެ އަރިއަކަށްވެސް ބޭއްވުނެވެ. ނަމަވެސް ސެޗުރޭޝަން އިތުރުވާގޮތެއް ނުވިއެވެ. މި ބޭބެއަކީ ޑީއެންއާރު (ޑޫ ނޮޓް ރެސަސިޓޭޓް) ދީފައި އޮތްޕޭޝަންޓެކެވެ. އަދި ވެންޓިލޭޓަރަށް ވެސް ނުލުމަށް އާއިލާއިން އެދިފައި އޮތް ބޭބެއެކެވެ. އެހެންކަމުން ބޭސްދިނުން ނޫން ކަމެއް އެވަގުތު ޑަކުޓަރަކަށް ކުރެވޭކަށް ނެތެވެ. ޑަކްޓަރުގެ ލަފާގެ މަތިން ބޭސްތައް ދިނީ ރިފާއެވެ. ބޭބެގެ ހަބަރެއް ނެތެވެ. ވިންދުވެސް ގެއްލުނީއެވެ. ސެޗުރޭޝަންވެސް ގެއްލުނީއެވެ. ޑީއެންއާރު ދީފައި އޮތުމުން އެހާލަތުގައި ސީޕީއާރު ދެވޭކަށްވެސް ނެތެވެ. ބަލަހައްޓައިގެން ތިބުން ނޫންގޮތެއް އެމީހުންނަކަށް ނެތެވެ. ބޭހުންވެސް އެއްވެސް އަލިމަގެއް ނުފެނުނެވެ. ޑަކްޓަރުގެ ބަހަކަށް ވީ އީސީޖާ ނެގުމެވެ. ރިފާގެ ލޮލުން ކަރުނަތައް ފައިބައިގަތީ ހަމަ ރަނގަޅަށްވެސް ރިފާ ގަބުކޮއްލާފައެވެ. ހުރި ފިޔަވަޅުމަތީ ރިފާއަށް ހުރެވުނީ ގަނޑުވެފައެވެ. އީސީޖީ ނެގީ އެހެންނަރުހެކެވެ. ސާފު ތެދު ރޮނގަކާއި އެކު ބޭބެވެސް މަރުވިކަމަށް ކަނޑައެޅިއެވެ.

"އޯކޭ! ޔޫކޭން ސިޓްޑައުން ޑިއާރ" ކައިރީގައި ހުރި އިންޑިޔާ ނަރުހަކު ބުނެލިއެވެ. އެވަގުތު މަރީއައިސް ރިފާގެ އަތުގައި ހިފައިގެން ގޮސް ގޮނޑީގައި ބޭންދިއެވެ. " ދެން ނުރޮއެބަ ރިފާ! އިޓްސް ނޮޓް ޔުއާ ފޯލްޓް އެންނު.. ހިތްވަރުކޮއްބަ.. މަޑުކުރޭ އިނގޭ މިތާ މަގެ މިދަނީ ބޭބެ ސާފުކޮއްލަން" އޯގާތެރިކަމާއި އެކު މަރީ ބުނެލިއެވެ.

މަރީ އާއި އަދި އެހެން ނަރުހަކާއި ވެގެން އެ ބޭބެގެ ފުރާނަ ނެތްމަސްގަނޑު ސާފުކޮށް ހަށަމަށް އަތްބަނދެ އެއްސުމަށް ފަހު އަައިސީޔޫއިން ނެރެލިއެވެ. އޭރު ގަޑިން 3 ޖަހާ ބޮޑުވެދާނެއެވެ.

މަރީ އެނބުރި ރިފާގެ ގާތަށް އައި އިރު ރިފާ ހިތްވަރު ކޮއްފައި ނޯޓްސް ލިޔަނީއެވެ. ހުރިހާކަމެއް ކޮށް ތަރުތީބުކުރީ ކަރުނައިން އެ ދެލޯ ތެމޭ ހާލުގައެވެ. ޑިއުޓީ ގަޑި ނިމިގެން އެއްޗެހި ބަދަލު ކުރަން ރިފާ ދިޔައީ މަރީ އާއި އެކުގައެވެ. މަރީގެ ހިތްވަރުން ރިފާ ހިތްވަރު ލިބިގަންނަން މަސައްކަތް ކުރިއެވެ. ނަމަވެސް އެއްދުވަހާ ދެ ފުރާނައެވެ. އަދި އެވެސް ރިފާގެ ދެ ޕޭޝަންޓުންނެވެ. އެންމެފަހުން މަރުވި ބޭބެގެ ހާލަތު ގޯސްވީކުއްލިއަކަށެވެ.

އެއްޗެހި ބަދަލުކުރުމަށް ފަހު ދެމީހުންވެސް ނުކުމެ މަޑުކުރީ މާލެ ދިއުމަށް ވޭނަށް އަރާށެވެ. 5 ޖަހާއިރު އަންނަ މި ވޭން އައުމުން ދެމީހުންވެސް ބަހަށް އެރިއެވެ. އެވަގުތު ބަހަށް އަރަން ތިބި ނަރުހުންގެ ތެރެއިން އައިސީޔޫގައި ރިފާއާއި އެކު އުޅުނު ނަރުހުން ރިފާއަށް ހިތްވަރު ދިނެވެ. މާޔޫސް ނުވުމަށް ބުންޏެވެ.

"އަހަރެންނަށް ކަމެއް ކުރެވުނީބާއެވެ! އަހަރެންގެ ދެ ޕޭޝަންޓުންނެވެ. ކީއްވެހެއްޔެވެ؟ ކީއްވެހެއްޔެވެ؟ އަހަރެންމީ ނަރުހަކަށް ކިޔާވަރުމީހެއްބާއެވެ؟ ގެއްލިގެން އެދިޔަ ފުރާނައިގެ ޒިންމާ އަހަރެން ނަގަން ޖެހޭނެބާއެވެ؟ ނަމަވެސް އަހަރެންގެ ކުށަކީ ކޮބައިހެއްޔެވެ؟" ވޭނުގެ ފަހަތު ސީޓުގައި ލެނގިލައިގެން އިން ރިފާގެ ހިތަށް އަރަމުން ދިޔައެވެ.

މާލެ އައިސް ގެއަށް ދިޔައީ މަރީއާއި އެކުގައެވެ. ގޭގައި އެދުވަހުގެ ބާކީބައި ރިފާ ހޭދަކުރީ އެ ނުތަނަވަސްކަމާއި ހާސްކަން ފިލުވާލެވޭތޯއެވެ. ނަމަވެސް އެ ފަކީރުގެ ހިތަކަށް ކުޅަދާނައެއް ނުވިއެވެ. އެރޭ އެފަކީރަށް ލޮލުފިޔައެއް ނުޖެހުނެވެ. އަނެއްދުވަހުގެ ހެނދުނުގެ ޑިއުޓީއަށް އެފަކީރަށް މަޖުބޫރުވީ ސިކްލީވް ނަޖާށެވެ. ނަމަވެސް ރިފާގެ އަޒުމު އަދިވެސް ވަރުގަދައެވެ. ހިތްވަރާއި އުންމީދުގެ ވިންދު ކަސިޔާރުވިޔަސް އަޒުމުގެ ވަރުގަދަ ކަމުން އެ ހިތުގެ ވިންދު ސިދާ ކުރުވައެވެ. އެހެނަސް އެއީ ވެސް އިންސާނެކެވެ. އިންސާނެއްގެ ފުރާނަ އިންސާނެއްގެ އަތްމަތީގައި ދާތަން ދެކެން އިންސާނަކަށް ކުޅަދާނަވާނީ ފަހެ ކިހިނަކުން ހެއްޔެވެ؟

 

ނިމުނީ (2/2 ބައި)