ދުނިޔޭގެ މޫސުމަށް އެކި ބަދަލުތައް އަންނަމުން ދިޔައެވެ. ދެދުވަހަކު އެއް މިޒާޖަކަށް އިރު އަރާތީ އަހަރެން ނުދެކެމެވެ. މިއަދަކީ ހެޔޮވަރު ވަރަކަށް ވައިޖެހޭ، އިރުވައިގެ ނަލަ ދުވަހެކެވެ. އުޑުމަތީގައި ހިސާބަކަށް ހުދު ވިލާ ހުއްޓަސް ދެމުން ދިޔައީ ސަނަ ސަނަ އަތްވެކެވެ.

އަރައިގެން އަންނަ ހޫނުގަދަ އިރުން، ދުނިޔޭގެ މާހައުލަށް ހޫނުކަން ވެރިކުރުވައިފިއެވެ. ބައިޖޯޑު ކަޅުސަޔާއި "ހޯހޯ" ބިސްކޯދުކޮޅަކާއި ލައިގެން ބޮވުނު ހެނދުނުގެ ސަޔަށްފަހު އަހަރެން ނުކުމެ ގޭގެ ބޭރުގައި، ރޯނުން ގަތާފައިހުރި ޖޯލިފަތީގައި އިށީނދެލީމެވެ. އަހަންނަކީ ރަށުގެ އެންމެން ގަދަރުކުރާ ރަށުގެ ކަލޭފާނެވެ. މަޝްހޫރު އަބޫބަކުރު ކަލޭފާނުގެ ދަރި ކާސިމް ކަލޭފާނެވެ.

ގެވަޅު ތެރޭގައި ހެދިފައި ހުރި ބޮޑު ބަނބުކެޔޮ ގަހުގެ ހިޔަލުގައި ދޭތެރެއަކުން ބީހިލާ އެހެރަ ފިނި ވައި ރޯޅިތަކުގެ ފިނިކަމުގައި މަޑިސީލަ ހުޅުވާލާ ފޯއް ފޮއްޗެއް ހަފާލީމެވެ. އަހަރެންގެ ދެ ފިރިހެން ދަރިން މަގުމަތީގައި ކުޅެން އުޅޭތީ އަހަރެން ދެކުނީމެވެ. އެ ދެބެއިންގެ މޫނުމަތީގައި އެހެރަ އުޖާލަކަމީ އަހަރެންގެ މި ހިތުގެ ވިންދެވެ. އެވެރިން ޖަހަމުންދިޔަ ސަކަރާތަށް އަހަރެންގެ ނަޒަރު ހުއްޓިފައި އިނދެވުނީ ހުނިކޮޅެއްވެސް ލާން ހަނދާންނެތިފައެވެ. ކޮންމެއަކަސް އިރުގަނޑެއް ވީފަހުން ދުފާ އަވަދިވެއްޖެއެވެ. ބޮލުގައި ހުރި ޒާތެއްގެ އެނބުރުންގަނޑެއްވެސް ފިލައި ހިނގައްޖެއެވެ. ނިތްކުރި މަތިން ހިލިފާ ހުރި ދާތިކިތައް ފޮހެލަމުން ޖޯލިފަތިން ފޫ ހިއްލައިލައިގެން ރަށުގެ އުތުރު ފަރާތު އަތިރިއާއި ދިމާލަށް ހިނގައިގަތީމެވެ.

"ބައްޕާ ކޮންތާކަށް!" އަހަރެންގެ ހަގު ދަރިފުޅު މޫސަ، މާބާރަށް ބުނެލިއެވެ. އޭނާގެ އުމުރުން ވާނީ 9 އަހަރެވެ. "މިދިމާ އަތިރިއަށް ނުކުމެލަން މިދަނީ..!" އަހަރެންގެ ދަރިފުޅަށް އަހަރެން ޖަވާބުދިނީމެވެ. "އަހަރެމެންވެސް ދާނަން ބައްޕައާއިއެކު.." ކަންކަމުގައި އަބަދުވެސް އަހަރެންނަށް އެހީތެރިވެދޭ އަހަރެންގެ ދޮށީ ދަރި، އަލީ ބުންޏެވެ. އޭނާ އަކީ މިހާރު 12 އަހަރުގެ ކުއްޖެކެވެ. "ދަންޏާ ގޮސް މަންމަ ކައިރި ބުނެފަ އާދޭ!" އެކުދިންގެ މަންމަގެ ހުއްދަ ހޯދުމަށް އަހަރެން އެދުނީމެވެ. އެކުދިންގެ މަަންމަ ރުގިއްޔާގެ ހުއްދައާއި އެކު އެދެބެއިން އަހަރެންގެ ފަހަތުން އަތުވެއްޖެއެވެ.

ރަށުގެ ވަލުތެރެއިން އަތިރިއަށް ދެވޭނޭހެން ކޮށާފައި އޮންނަ ހަނި މަގަކުން ހިނގާފައި ގޮސް އަތިރިއަށް ނުކުމެވިއްޖެއެވެ. ޖެހެމުން ދިޔަ ނަލަ ވައި ރޯޅިތައް ހަށިގަނޑުގައި ބީހުނީ، އިސްތަށިތައް ކޮޅަށް ޖަހުވާލާފައެވެ. ހޭޅި ތެރެއިން އިވެނީ މަޑު ރާގަކަށް އެކި ޒާތްޒާތުގެ ދޫނި ގޮވާ އަޑެވެ. އާނުގަނޑުމަތީގައި ދެތިން ފިނދަނަ އެއްވާމަކަށް ބޯޖަހާލާ ނަގޫނަޖަހާލާ އިނެވެ. އާނުގަނޑުގެ އެއްގަމުގައި ދެކޮޅު ދެކޮޅަށް ދުވާ ކިރުކަކުނިތައް އުޅެއެވެ. މޫދުގައި އެކި ވަރު ވަރުގެ ކަޅުއޮށާއި މެކުނު، ބިންގަނޑުކޮނެ ކައި ހަދާ އުޅޭ މަންޒަރު، އެސާފު ލޮނުގަނޑުގެ ތެރެއިން ފެނެއެވެ. ތޮށިމަތީގައި ހިކިފައި އިން ގަލަކާއި ދިމާލުން މާ ބާރު އަޑެއްލައްވާލައިފައި މާކަނައެއް އުދުހި ދާތީ އަހަރެން ދެކުނީމެވެ. އުރަފަށުން، ހަނޑެލި ފުމެއަރާތީވެސް އަހަރެން ދުށީމެވެ.

އަހަރެންގެ ދެ ދަރިން ގޮނޑުދޮށަށް ފޭބީ މި ހިތްގައިމު މަންޒަރުގައި އެކުދިންގެ ސިކުނޑި ތާޒާކޮށްލާށެވެ. އެ ދެބެއިންގެ ފަހަތުން އަހަރެންވެސް ހިނގައިގަތީމެވެ. ރާޅުފަށާއި ހިސާބަށް ފޭބިއްޖެއެވެ. އެދެބެއިން އަތިރީގައި ސަކާރަތުގައި އުޅުނެވެ. ފައްތިޔަލުގައި އަޅާފައި އޮތް އަހަރެންގެ ބޮއްކުރާގަނޑުގެ ފުށުވަލަށް ދަމާލާ އެ ބޮއްކުރާގަނޑު ގާތްކޮށްލީމެވެ. ކަކޫތާ ފެނަށްވުރެ ގާތްވާގޮތް ނުވުމުން، ކަކޫތާފެނަށް އެރި ބޮއްކުރަލުގެ ތެރެއަށް މީހާ ދެމިގަތީމެވެ. މަޅުގަނޑުމަތީގައި، ވަތަށް ދެފައިލައިގެން އިށީނދެލީމެވެ. ދެތިން ފުންނޭވާއެއް ދޫކޮށްލަމުން ދުނިޔޭގެ އުދަރެހަށް ބަލައިލީމެވެ. ނަފްސަށް އެ ލިބުނު ހިތްހަމަޖެހުން، ގަލަމުން ބަޔާންކުރަންވެސް ކުޅަދާނައެއް ނުވާނެއެވެ. އެހެން ދުވަސްތަކާއި ހިލާފަށް މިއަދު އަހަރެންގެ ހިތުގައި އެހެން ވިންދެއް ޖަހާކަލައެވެ. އަހަރެންނަށް މިއަދުގެ މި ފުރިހަމަ ވައިރޯޅިތައް ވަރަށް ކަމުގޮއްސިއެވެ. އަހަރެންގެ ހިތް އެދި ގޮވަނީ މި ބޮއްކުރަލުގައި ރިޔާނަގައިގެން ގުދުރަތްތެރިކަމުގެ ތެރޭގައި ދުއްވާލަށެވެ. އަހަރެމެންގެ ޅަދުވަސް ހިތަށް ގެނުވާށެވެ. އުފާވެރިކަމާއި ހިތްހަމަޖެހުން ފުރާނައަށް އިހުސާސް ކުރުވާށެވެ.

މި ފުން ހިޔާލުތަކުގައި އިނދެ، ބޮއްކުރަލުގެ ވަތުގައި ހެދިފައިހުރި ދިޔަކޮޅު، ގުދުވެ ގުދުވެފައި ހިއްކާލީމެވެ. އެއަށްފަހު ބޮއްކުރަލުން ފައިބައިގެން އަހަރެންގެ ދެ ދަރިންނާއި ދިމާލަށް ހިނގައިގަތީ، ރިޔަލުގައި ރަށު އޮއެމައްޗަށް ނަމަވެސް ނުކުމެލާން، ދަތުރެއް އަޅާލާނަންކަމަށް އަޒުމް ކަނޑައަޅައިގެންނެވެ. އެ ދެމީހުން ގޮވައިގެން ގެއާއި ދިމާލަށް ދާން ހިނގައިގަތީމެވެ. ގެއަށް ވަދެ ތަނެއްގައި ފޫޖައްސާނުލެވެނީސް ބަންގީގެ އަޑު އިވެން ފަށައިފިއެވެ. ހަރުކޮށް ހިނގާފައި ގިފިއްޔާއި ދިމާލަށް ގޮސް ދޮރުގައި އަޅާ ކޮއްޕާލި އިރު، ދޮރުގައި ހުރީ އެތެރެއިން މަކުޑި އަޅުވާފައެވެ. އަހަރެން އެބަ އުޅެމޭ މި ނުކުންނަނީއޭ ރުގިއްޔާ ބުންޏެވެ. ރުގިއްޔާ ނުކުންނަންދެން އުނަގަނޑުގައި އެއް އަތް ވިއްދާލައިގެން ގިފިލި ފާރުގައި ލެނގިލައިގެން "ދަތުރާއި" މެދު ވިސްނާލަން ހުރީމެވެ. 

 

(ނުނިމޭ)