މިފަހަރުގެ ފީފާ ވޯލްޑް ކަޕްގައި ރޭ ރިޗާލިސަން ވައްދާލި ދެ ލަނޑާއެކު ބްރެޒިލުން 2-0 އިން ސާބިއާ ބަލިކޮށްފިއެވެ.

މިއީ 2010 ވަނަ އަހަރުގެ ވޯލްޑް ކަޕްގެ ފަހުން ޔޫރަޕްގެ ޓީމުތަކާ ދެކޮޅަށް ބްރެޒިލް ކުޅުނު ނުވަ މެޗުގެ ތެރެއިން މޮޅުވި ތިންވަނަ ފަހަރެވެ. ދެ މެޗުން އެއްވަރުވިއިރު، ހަތަރު މެޗުން ވަނީ ބަލިވެފައެވެ.

މި ނަތީޖާއާއެކު ބްރެޒިލަށް ގްރޫޕް ޖީ ގެ އެއްވަނަ ލިބިފައިވަނީ ތިން ޕޮއިންޓާއެކު އެވެ. ދެވަނައިގައި އޮތް ސްވިޒަލެންޑަށް ވެސް މިއަދަދަށް ޕޮއިންޓް ލިބިފައިވާއިރު، ބްރެޒިލަށް ކުރިލިބެނީ ފައިދާ ގޯލްގެ ތަފާތުންނެވެ. ތިންވަނައިގައި އޮތް ކެމަރޫނާއި ހަތަރުވަނައިގައި އޮތް ސާބިއާ އަށް އަދި ޕޮއިންޓެއް ނުލިބެއެވެ.

ލުސައިލް ސްޓޭޑިއަމްގައި ރޭ ކުޅުނު މި މެޗުގެ ފުރަތަމަ ހާފުގައި ދެ ޓީމަށް ގޯލެއް ޖެހިފައިނުވާއިރު، މި ހާފުގައި ސާބިއާ އިން ވަނީ ރަނގަޅު ކުޅުމެއް ދައްކާ ބްރެޒިލްގެ އެޓޭކްތައް ހުއްޓުވުމުގައި ކާމިޔާބު ހޯދާފައެވެ. އެގޮތުން، ފުރަތަމަ ހާފުގައި ބްރެޒިލްގެ މިޑްފީލްޑަރު ކަސެމީރޯ އާއި ރަފީނިއާ ފޮނުވާލި ހަމަލާތައް ސާބިއާގެ ކީޕަރު ވަންޔާ މިލިންކޮވިޗް ސަވިޗް ވަނީ ހުއްޓުވާފައެވެ. ސާބިއާ އަށް މި ހާފުގައި ލިބުނު އެންމެ ރަނގަޅު ފުރުޞަތުގައި އެ ޓީމުގެ ކެޕްޓަން ޑޫސާން ޓަޑިޗް ދިން ބޯޅައަކުން އަލެކްސެންޑާ މިޓްރޮވިޗް ފޮނުވާލަން މަސައްކަތްކުރި ހަމަލާ ބްރެޒިލްގެ ކީޕަރު އެލިސަން ބެކާ ވަނީ މަތަކޮށްފައެވެ.

މި މެޗުގައި ބްރެޒިލުން ޖެހި ފުރަތަމަ ލަނޑު، 62 ވަނަ މިނެޓުގައި ކާމިޔާބުކޮށްދިނީ ރިޗާލިސަން އެވެ. މިއީ އެ ޓީމުގެ ވިނީޝަސް ޖޫނިއާ ފޮނުވާލި ބޯޅައެއް ކީޕަރު މިލިންކޮވިޗް ސަވިޗް އަތުގައި ޖެހިފައި ނިކުތް ވަގުތު ދެވަނަ ފަހަރަށް އެ ބޯޅަ ރިޗާލިސަން އަށް ލިބުމުން ކާމިޔާބުކުރި ގޯލެކެވެ. އަދި އޭގެ 11 މިނެޓުފަހުން، ބްރެޒިލްގެ ދެވަނަ ލަނޑުޖެހީ ވެސް ރިޗާލިސަން އެވެ. މިއީ ވިނީޝަސް ދިން ބޯޅައަކުން ޕެނަލްޓީއޭރިޔާ ތެރެއިން ވަރަށް ރީއްޗަށް ކޮންޓްރޯލް ކޮށްލުމަށްފަހު ރިޗާލިސަން ކާމިޔާބުކުރި ހިތްގައިމު ގޯލެކެވެ.

ބްރެޒިލުން މި މެޗު ކާމިޔާބުކުރި ނަމަވެސް، މެޗު ނިމެން 11 މިނެޓަށްވެފައިވަނިކޮށް އެ ޓީމުގެ އެންމެ މުހިއްމު ކުޅުންތެރިޔާ ކަމަށްވާ ނޭމާގެ ފައިގެ ކުޑަހުޅަށް ލިބުނު އަނިޔާއަކާ ގުޅިގެން ބަދަލުކޮށްފައިވާއިރު މިއީ ކުރިއަށް އޮތް މެޗުތަކާ ކުރިމަތިލާއިރު ކޯޗު ޓީޓޭ އަށް ބޮޑު ނުތަނަވަސްކަމެކެވެ.

ބްރެޒިލަށް ދެން އޮތީ މި މަހުގެ 28 ވާ ހޯމަ ދުވަހު ސްވިޒަލެންޑާ ދެކޮޅަށް ކުޅޭ މެޗެވެ. އެއަށްފަހު، ގްރޫޕް ސްޓޭޖުގައި އެ ޓީމު ކުޅޭ ފަހު މެޗުގައި އަންނަ ޑިސެންބަރު މަހުގެ ތިންވަނަ ދުވަހު ނިކުންނާނީ ކެމަރޫންއާ ދެކޮޅަށެވެ.