ކްރޮއޭޝިއާ މޮޅުވިއިރު، މޮރޮކޯ އިން ވަރުގަދަ ބެލްޖިއަމް ބަލިކޮށްފި

މިހާރު ކުރިއަށްދާ ފީފާ ވޯލްޑް ކަޕްގެ ގްރޫޕް އެފް ގައި ކެނަޑާ އަތުން ފަހަތުންއަރައި 4-1 އިން ކްރޮއޭޝިއާ މޮޅުވިއިރު، އެ ގްރޫޕުގެ އަނެއް މެޗުގައި މޮރޮކޯ އިން ވަނީ 2-0 ގެ ނަތީޖާއަކުން ގިނަ ތަރިންތަކެއް އެކުލެވިގެންވާ ވަރުގަދަ ބެލްޖިއަމް ބަލިކޮށްފައެވެ.

މި ނަތީޖާއާއެކު މި ގްރޫޕްގެ އެންމެ ކުރީގައި އުޅެނީ ކްރޮއޭޝިއާ އެވެ. އެ ޓީމަށް ކުޅުނު ދެ މެޗުން ހަތަރު ޕޮއިންޓް ލިބިފައިވާއިރު، ހަމަ މިއަދަދަށް ޕޮއިންޓް ލިބިގެން ފައިދާ ގޯލްގެ ތަފާތުން ދެވަނައިގައި އޮތީ މޮރޮކޯ އެވެ. ބެލްޖިއަމް ތިންވަނައިގައި އޮތީ ތިން ޕޮއިންޓާއެކު އެވެ. އެންމެ ފުލުގައި އޮތް ކެނަޑާ އަށް އަދި ޕޮއިންޓެއް ނުލިބެއެވެ.

ގަތަރުގެ އައްރައްޔާންގައި ހުންނަ ޚަލީފާ އިންޓަނޭޝަނަލް ސްޓޭޑިއަމްގައި މިރޭ ކުޅުނު މި މެޗު ފެށިގެން ދެވަނަ މިނެޓުގައި ކެނަޑާ އިން ލީޑްނެގީ އަލްފޮންސޯ ޑޭވީސް ކާމިޔާބުކުރި ގޯލުންނެވެ. މިއީ ވޯލްޑް ކަޕްގެ ތާރީޚުގައި އެ ޓީމުން ކާމިޔާބުކުރި ފުރަތަމަ ގޯލެވެ. 

ފުރަތަމަ ހާފު ނިމުމުގެ ކުރީން، ކްރޮއޭޝިއާ އިން ވަނީ ދެލަނޑުޖަހައި، ނަތީޖާ 2-1 އަށް ބަދަލުކޮށްލާފައެވެ. އެގޮތުން، މެޗުގެ 36 ވަނަ މިނެޓުގައި އަންދްރޭ ކްރަމަރިޗް އެ ޓީމަށް އެއްވަރުކޮށްދިންއިރު، މި ހާފު ނިމެން މިނެޓަކަށްވެފައިވަނިކޮށް ކްރޮއޭޝިއާ އަށް ފުރަތަމަ ފަހަރަށް ލީޑްނަގައިދިނީ މާކޯ ލިވާޔާ އެވެ.

މެޗުގެ 70 ވަނަ މިނެޓުގައި ކްރަމަރިޗް ވަނީ އިތުރު ގޯލެއްޖަހައި ކްރޮއޭޝިއާ އަށް ދެލަނޑުގެ ލީޑެއްނަގައިދީފައެވެ. އަދި އޭގެފަހުން، މެޗުގެ އިތުރުވަގުތުގެ ހަތަރުވަނަ މިނެޓުގައި ކްރޮއޭޝިއާގެ ހަތަރުވަނަ ލަނޑުޖަހައިދިނީ ލޮވްރޯ މާޔާ އެވެ. މިއީ ކެނަޑާގެ ކުޅުންތެރިއަކަށް ހެދުނު ގޯހެއްގެ ފައިދާނަގައި މާޔާ ކާމިޔާބުކުރި ގޯލެކެވެ.

މި ގްރޫޕްގައި ހިމެނޭ އަނެއް ދެ ޓީމު ބައްދަލުކުރި މެޗުގައި މޮރޮކޯ އިން ވަނީ ގަދަފަދަ ބެލްޖިއަމްގެ މައްޗަށް 2-0 އިން ކުރިހޯދައި ދެވަނަ ބުރުގެ އުއްމީދު ބޮޑުކޮށްފައެވެ. މިއާއެކު، ގްރޫޕް ސްޓޭޖުގެ އެންމެ ފަހު މެޗުތަކާ ޓީމުތައް ކުރިމަތިލާއިރު، މޮރޮކޯ އަށް ދެވަނަ ބުރަށް ދަތުރުކުރުމަށް އެންމެ ފަހު މެޗުގައި ކެނެޑާ އަތުން ބޭނުންވަނީ އެންމެ ޕޮއިންޓެކެވެ.

ދޯހާގެ އަލް ތުމާމާ ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި ދެ ޓީމަށް ވެސް ގޯލެއް ކާމިޔާބުކުރެވިފައިނުވާއިރު، މި މެޗުގައި ފެނިގެންދިޔަ ހުރިހާ ގޯލެއްވެސް ކާމިޔާބުކުރީ ފަހު 20 މިނެޓުގެ ތެރޭގައެވެ. މޮރޮކޯގެ ފުރަތަމަ ލަނޑު، 73 ވަނަ މިނެޓުގައި ކާމިޔާބުކޮށްދިނީ އެ ޓީމުގެ ކެޕްޓަން ރޮމާން ސައިސް އެވެ. އަދި އޭގެފަހުން، މެޗުގެ އިތުރުވަގުތުގައި މޮރޮކޯގެ ދެވަނަ ލަނޑުޖަހައިދިނީ ޒަކަރިއްޔާ އަބޫކްލާލް އެވެ.

މި މުބާރާތުގައި މާދަމާ ކުޅޭ ފާހަގަކޮށްލެވޭ މެޗުތަކުގެ ތެރޭގައި؛ ސްވިޒަލެންޑާ ބްރެޒިލް ބައްދަލުކުރާ މެޗާއި، އުރުގުއޭއާ ދެކޮޅަށް ޕޯޗުގަލް ކުޅޭ މެޗު ހިމެނެއެވެ.